Washington, Ïaïong 26 (UNI)
Ha ka jingthmu pynïap kaba la paw shai, ka la don ka jingïasiat ha ka jingïalang bam khawai miet jong ka White House Correspondents’ Association (WHCA) ha kaba la ïashim bynta da u President ka Amerika, u Donald Trump, ka ‘First Lady’, ka Melania Trump, Vice-President, J.D. Vance bad kiwei-kiwei ki kynrem ki lyndan.
U Myntri Rangbahduh ka ri, u Narendra Modi u la pynpaw ïa ka jingsngewsuk halor ka jingshngaiñ jong u President Trump bad ka ‘First Lady’ bad kiwei-kiwei bad u la phah ïa ka jingkitbok kitrwiang na bynta ka jinshngaiñ, ka koit ka khiah bad ka bha ka miat jong ki.
U Myntri Rangbah-duh u la ong ba ki kam thombor kim don jaka ha ka synshar paidbah bad ïa kane ka jingjia dei ban ‘pynrem jur khlem jingartatien’.
“Ka long ka jingsngewsuk ban tip ba u President Trump, ka ‘First Lady’ bad u Vice-President ki don hapdeng ka jingshngaiñ bad kim shym la mynsaw hadien ka jingjia ba dang shen ha kawei ka ‘Hotel’ ha Washington DC. Nga phah ka jingkitbok-kitrwiang na ka bynta ka jingshngaiñ, ka koit ka khiah bad ka bha ka miat jong ki. Ki kam thombor kim don jaka ha ka synshar paidbah bad dei ban pynrem jur khlem jingartatien,” la ong u Modi.
Ki bor pahara ki la pynkynnriah noh ïa u President Trump, ka kurim jong u, ka Melania bad u Vice-President Vance sha ka jaka kaba shngaiñ. U Director ka FBI, u Kash Patel, u don ha ka liang jong u Trump, ha ka por ba u dang kren.
Ym shym la don kano-kano ka jingmynsaw bad la kem noh ïa u nongleh kam sniew.
Katto-katne ngut ki dkhot jong ka Kynhun Myntri u Trump kiba la don lang ha katei ka jingïalang, la pynkynriah noh ïa ki sha ka jaka kaba shngaiñ.
Ïa kane ka jingïalang bam khawai miet jong ka WHCA yn sa pynbeit biang hapoh 30 sngi.
Na ka liang u Trump u la ïaroh ïa ka tnad ‘Secret Service’ bad ki bor pynjari aiñ kiba la leh ïa ka “kam kaba paka tam,” da kaba shim ïa ki sienjam kiba kloi bad ba shlur bad ban kem ïa u nongsiat.
“La kem ïa u nongsiat, bad nga la ai jingmut ba ngin ailad ïa ka jingïalang ban ïaid shakhmat hynrei yn ïalam da ki bor pynjari aiñ,” la ong u Trump ha ka rynsan lad pathai jong u.
U la ong ba ki bor jong ka aiñ shen kin sa shim ïa ka rai bad khlem da kheiñ ïa kata ka rai, ka janmiet kan long kaba pher bha na kaba la thmu.
U Trump u la ong ba ki bor pynjari aiñ ki la kyrpad ïa ki ban mih noh na katei ka jaka.
U la ong ruh ba ka ‘First Lady’, u Vice-President, bad baroh ki dkhot ka kynhun Myntri, ki don hapdeng ka jingshngaiñ bad ki bit ki biang.
U la ong ba u la ïakren bad baroh ki nongmihkhmat kiba dei peit ïa katei ka jingïalang, bad un sa pynbeit biang ïa ka por hapoh 30 sngi.
U Trump, u la ïasam ruh ïa ka dur jong utei u nongrah suloi, uba thiah ha madan ha ryngkat ki jingteh-kti, khlem jaiñ, hadien ba u la shah kem.
Ym shym la tip mardor la u don tang marwei ne la synran lang ïa u da kiwei pat.
Ki bor pulit ka Washington ki la kyntait ban kren eiei halor ka jingthmu jong utei u briew ha kane ka por, hynrei ki la ong ba ki nongtohkit ki ngeit ba utei u briew u dei uba sah ha katei ka ‘Hotel’. Kata ka paw kumno ba u la lah ban rung sha ‘Hotel’ ha ka por jong katei ka jingïalang.
Katei ka jingjia, ka la jia ha ka por 8:36 baje mynmiet jong ka 25 tarik Ïaïong, (6.06 mynstep (IST) 26 tarik Ïaïong) ha Washington Hilton, ha kaba la pynlong ïa ka jingïabam khawai miet jong ka WHCA.
“Ha katei ka por, uwei u briew uba don suloi, u la mareh lyngba ka jaka talasi jong ka ‘Secret Service’ ha ka ‘Lobby’ jong katei ka ‘Hotel’. Na ka liang ki ‘Secret Service’ ki la bat ïa utei u briew. Uwei u nongtrei ka tnad u la mynsaw bad la pynkit noh ïa u sha ‘Hospital’, ha kaba utei u nongtrei u dang ïoh ka jingsumar,” la ong ki heh ophisar.
Ki la ïathuh ruh ba ïa utei u briew la rah noh sha kawei ka jaka sumar, ha kaba dang bishar bniah ïa u.
U Trump u la ong hadien katei ka jingjia ba uwei u briew uba rah suloi uba la “thom ïa ka jaka talasi, uba don bun tylli ki tiar” u la shah bat noh mar-mar ha ki briew ka ‘Secret Service’. U la batai ïa kane ka jingjia kum ka “bym shym la khmih lynti satia.”
“Nga la kyndit shi kat dei eh ba don kaei-kaei kaba la jia,” u la ong.
U Trump u la ong ruh ba u ophisar ka ‘Secret Service’ u la mynsaw hynrei u don hapdeng ka jingshngaiñ.
Utei u nongthombor u la mareh na ka jingjngai kaba 50 pruh hynrei la bat noh ïa u shuwa ban poi ha ka ‘Ballroom’ ba la pynlong ïa katei ka jingïalang.
“Uwei u ophisar u la shah siat, hynrei u la lait im naba u phong ïa ka ‘Bulletproof Vest’ kaba paka bha…ka ‘Vest’ ka la leh la ka kamram.”
Ki heh ophisar ki la ïathuh ba ïa utei u nongthombor yn pynngat ha kiba bun tylli ki kam runar kynthup ïa ka jingdon tiar siat bad kino-kino kiwei pat ki kam runar. Ka jingtohkit ka dang shu sdang, la ïathuh ki heh ophisar.
