Jowai, Ïaïong 26
Ka Joint Action Committee, kaba kynthup ïa ka East Jaiñtia Hills Truck Owner and Transporter Association bad ka Jaiñtia Hills Truck Owners’ Association, ka la bteng bad nangpynjur shuh shuh ïa ka jingïakhih ba khlem buh por, ban bat bad pynphai noh ïa ki ‘bulker truck’ jong baroh ki karkhana pynmih dewbilat ha East Jaiñtia Hill kumjuh ïa ki trok kiba dei jong ka Star Cement bad Dalmia Cement.
Ka JAC ka la sdang ïa ka jingïakhih da kaba bat bad pynphai noh shwa tang ïa ki ‘bulker truck’ kit dewbilat jong kitei ki kompany naduh ka 14 tarik Ïaïong ha Tuber Tahkhniang, East Jaiñtia Hills. Hynrei, naduh ka 24 tarik pat, mynta hi u bnai, ka la nang pynjur shuh shuh ïa ka jingïakhih, da kaba bat bad pynphai noh sa ïa kiwei ruh de ki trok kit dewbilat bad clinker jong ka Star Cement bad Dalmia Cement.
Ha ka kyrwoh ba la phah la ong ba ka daw ba la pynlong ïa ka JAC ban shim da kane ka sien jam, ka long halor ki artylli ki nongrim ban dawa na kitei ki karkhana pynmih dewbilat ban pynduh pyndam noh shisyndon ïa kitei ki bulker truck, namar, ka jingpyndonkam ïa kitei ki jait trok ban kit bad leit buh dewbilat sha kylleng ki jaka ha Ri Khasi-Jaiñtia bad ha ka jylla hi baroh kawei, ka la ktah shi katdei eh ïa ka ïoh kam ïoh jam jong ki trai trok trai ri trai muluk ha kitei ki kompeni.
Ban pyntreikam hok ïa kaei kaba la ïapynbeit bad ka Star Cement bad ka Dalmia Cement, ba dei ban ai trip mar 9 trip ha ka shisngi ïa kawei kawei ka seng bad kumta ter-ter. Hynrei, kumba long mynta, kitei ki kompeni, ki ai trip tang 3 haduh 6 trok ïa kawei-kawei ka seng, nalor sa ka jingpyn-ap slem ïa ki trok haduh 4 haduh 9 sngi ha ka jaka thep bad pynhap mar. Kane, ka la nang ktah shuh shuh ïa ka jingïoh trip jong ki trai trok trai ri trai muluk.
Halor kane ka jingïakhih lada kitei ki kompeni pynmih dewbilat kim patiaw ei ei, ka JAC kan sa nang pynjur shuh shuh ïa ka jingïakhih jong ka nangne shakhmat bad lada jia ei ei kaba sngewsih, kitei ki kompeni kin hap ban shim ïa ka jingbahkhlieh,” la ong ka kyrwoh ka JAC.
