Shillong, Ïaïong 26
Kum shi bynta ban pynthikna ïa ka jingshngaiñ ka ïaid ka ïeng, ka leit ka wan, kumjuh ban pynlong ïa ka jingbud ryntih ïa ki kyndon ñiah kali, ki pulit ka East Khasi Hills ha ka janmit 25 tarik u ïaïong 2026 ki la pynlong ïa ka jingkhynra naphang ïa ki kali ha nongbah Shillong bad ïoh lum haduh T.2,46,000 (ar lak sawphew hynriew hajar tyngka) na kaba daiñkuna ïa kiba pynkheiñ kyndon.
Ïa kane ka jingkhynra la ïalam da u Superintendent of Police, ka East Khasi Hills, kumjuh u SP (City/Traffic) bad u Addl SP Traffic bad la pynlong ïa ka jingkhynra ha ki lai tylli ki bynta jong ka Nongbah Shillong kiba hap hapoh ka Sadar, Laitumkhrah bad Lumdiengjri Police Station.
Ka jingthmu jong kane ka jingkhynra ka long ban pynbeit ïa ka jingpynïaid kali, ban pynbha ïa ka jingpynïaid kali bad na ka bynta ka jingshngaiñ jong ki paidbah ba leit bawan, khamtam ha ki por miet, naba ha ka por mynmit ka jur eh ka jingpynkheiñ ïa ki kyndon ñiah kali.
Ha kane ka jingkhynra ki pulit ki pynlong ïa ka jingpeit bniah ïa ki briew ba ñiah kali ha ryngkat ka jingbuaid, kiba tah ïit-ïong be-aiñ, kiba teh ïa ki jingshai ba thaba ba la ktah ïa kiwei kiba ñiah kali bad ïa kiba ñiah kali khlem ki kot ki sla kiba biang kumjuh ïa kiwei de kiba pynkheiñ ïa ki kyndon jong ka Motor Vehicles Act, lyngba kane ka jingkhynra ki pulit ki la ïoh bat 194 tylli ki kali ba pynkheiñ aiñ bad ïoh lum T.2,46,000 ka kuna.
Palat 100 ngut ki pulit kiba la don bynta ha kane ka jingkhynra, kaba kynthup ïa ki ophisar na ka tnad pynïaid kali (traffic) bad ki thanad ba marjan (Police Station). Ïa kawei pa kawei ka jaka ba pynlong ïa ka jingkhynra la khmih bniah da ki ‘Gazetted Officers’ ban pynthikna ïa ka jingtreikam kaba ryntih bad kaba ïadei ha kylleng ka nongbah Shillong.
Ki heh Sorkar ki ong ba kane ka jingkynra ïa ki kali ka long shibynta ka jingtrei ba khlem shongthait jong ki Pulit ka East Khasi Hills ha kaba ïadei ban khanglad ïa ki jingpynkheiñ aiñ ki ba ñiah kali, ban pynthikna ïa ka jingbud ryntih ïa ki kyndon ñiah kali bad ban pynthikna ruh ïa ka jingshngaiñ ki paidbah ha ki surok.
