Shillong, Ïaïong 27
U MDC ka Voice of the People Party na Lyngkyr-dem-Laitkroh u Bah Shemborlang Rynjah u la dawa ïa ka Ministry of Road Transport and Highways ka Sorkar Pdeng ban pynlong da ka jingpeit bniah ba kyrkieh haba ïadei ki jingjia ba ju jia man ka por bad ka jingbymlong shngaiñ ka surok Shillong-Pynursla-Dawki, na ka jingpyntrei ïa ka surok National Highways kaba dang ïaid.
Ha ka shithi ba u Bah Samborlang Rynjah u la phah sha u Nitin Gadkari, u la kdew ba kane ka surok ka long kaba kongsan bha ha ka leit ka wan jong ki paidbah ka thaiñ Pynursla, Dawki bad kiwei, ki kam pynheh ïa ka surok ki dang ïaid shakhmat, kaba la wanrah ruh ka jingkiew ki jingjia aksiden kaba la pynlong ruh ïa kiba bun ki mynsiem briew ban duh noh la ka jong ka jingim bad kane ka pyni ïa ka jingbymlah ban pynthikna ïa ka jingshngaiñ jong ka surok ha ka por ba pyntrei.
U Bah Shemborlang u la ong ba ka jingpeit bniah ïa kane surok ka long kaba donkam bha bad ban bishar bniah ïa ki jingma ha shilynter jong ka surok, namar kane ka surok ka dei kaba pynïasoh sha ki katto katne ki jaka jngohkai pyrthei kum ka Shnongpdeng bad Mawlynnong ki jaka ba la khring shibun ïa ki nongwan jngohkai pyrthei hapoh ka Jylla.
U la kdew ruh ba dang shen ki khubor ki pynpaw ïa ki jingeh kiba mih namar ka jingpyntrei ïa ka surok Shillong-Dawki, kynthup ïa ka jingïap jong arngut ki briew hadien ka jingtwa ka khyndew bad jingkhyllem ki maw kiba la tap ïa ka kali kaba ki shong.
Shuh-shuh u la kdew ba naduh u snem 2023 haduh mynta, ym duna ïa 10 ngut ki mynsiem briew kiba la duh noh la ka jingim ha ki jingjia aksident nama ka jingtwa khyndew bad ka jinghap jong ki maw.
“Kine ki jingjia kiba ju jia man ka por ki kdew shai ka jingbymlah ban pynthikna ïa ka jingshngaiñ haba pyntrei ïa ka surok, kaba pynkheiñ ïa ki kyndon ka Motor Vehicles Act, 1988 (as amended), Indian Road Congress (IRC) bad ki jingbthah ba la buh halor ka jingshngaiñ ha ki jaka trei,”u la ong ka shithi.
U la pynpaw ïa ka jingbym don ki jingthoh jingmaham, ki Reflector bad ki jingïada na ka jingtynrah ha ki jaka ba don jingma, ka jingpyntrei torti, ka jingtih maw khlem da bud ïa ki kyndon kaba buh jingma ïa ka leit ka wan jong ki nongleit nongwan.
U la kyntu ïa ka Ministry of Road Transport and Highways ka Sorkar Pdeng ban tuklar haba ïadei ban pynbeit bad pynthikna ba kum kine ki jingjia ba sngewsih kim dei shuh ban jia ha ki sngi ban dang wan.
