Shillong, Ïaïong 27
Ka North East Students’ Organisation (NESO) ka la dawa ïa ka jingtuklar kaba mardor, ka bym shah liang bad kaba shai ban khang lad ïa ka jingnang jur shuh-shuh jong ka jingïakynad ha Manipur, da kaba pynpaw ïa ka jingsngewkhia kaba khraw halor ki kam thombor bad ka jingïaumsnam kaba ju jia na ka por sha ka por ha katei ka Jylla.
Ha ka kyrwoh khubor ba la pynmih ha ka Lah Sngi U Blei, ka NESO ka la ong ba ka sngewsih jur bad ka pynpaw ïa ka jingsngewkhia kaba khraw halor ki kam thombor bad ka jingïaumsnam kaba jia na ka por sha ka por kaba ïai bteng ban pynjynjar ïa ka Jylla Manipur.
“Ka seng ka sngewsih jur halor ka jingbteng jong kum kine ki jingjia ba sngewsih, ha kaba la duh noh ïa ki jingim ba lui-lui bad ïa ka nongrim jong ka shong suk shong shngaiñ kaba la nang jot nang pra khlem sangeh,” ong ka kyrwoh.
Da kaba ñiew ïa ki jingshah thombor jong ki ‘riew paidbah kum ka “jingsngewkhia kaba jur ïa ka longbriew-manbriew,” ka NESO ka la ong, “Kine ki kam thombor ba ju jia man ka por pyrshah ïa ki ‘riew paidbah ki bym don tiar don tar ki pyni ïa ka jingsngewkhia kaba jur ïa ka longbriew-manbriew kaba ktah ïa ka tynrai jong ka burom briew, ka jingshngaiñ bad ka hok ba kongsan ban im ha ka jingsuk.”
“Ka jingkulmar ba dang bteng ka wanrah ïa ka jingjynjar ka bym lah ban batai ïa ki longïing bad ki jaidbynriew ki bym lah ñiew – kaba iehnoh pat shadien ïa ka jingsngewsih, jingtieng bad ka jingbym tikna,” ka la bynrap.
Ka seng ka la pynpaw ïa ka jingsngewlem sha baroh ki longïing kiba la duh noh ïa kiba ieid ba thoiñ ha kane ka jingïakynad kaba la slem bad ka ïeng ha syndah ha ryngkat ka jingïatylli bad baroh ki lanot kiba shah ktah ha kane ka jingjia ba sngewsih.
“Ka jingjynjar kaba ki paidbah ki mad ka dei ka jingjynjar kaba ïasam lang da ka Thaiñ Shatei Lam Mihngi baroh kawei,” la ong ka NESO.
Haba buh jingkylli ïa ka jubab jong ki bor ba dei khmih, ka NESO ka la ong, “Ha kane ka por kaba eh, ka seng ka shem ba ka long kaba donkam ban buh jingkylli halor ka jingbym lah jong ki bor synshar Jylla bad Sorkar Pdeng ban tuklar bad pynkut noh ïa kane ka jingeh kaba la neh la slem, kaba la ïaid mynta la bun-bun snem.”
“Ka jingbym lah ban wanrah biang ïa ka jingsuk bad ka jinglong-jingman kumba ju long ka pynpaw ïa ka jingbym larkam kaba sngewkhia ha ka synshar-khadar bad ka jingkitkhlieh,” ka la ong.
“Ka NESO ka dawa ïa ka jingtuklar kaba mardor, ka bym shah liang bad kaba shai ban pynsangeh ïa ka jingnang jur shuh-shuh jong ki kam thombor. Ka long kaba donkam eh bam pynïoh ïa ka hok khlem da pynslem,” la ong ka kyrwoh.
“Kito kiba donkti ban leh ïa kum kine ki kam ba shyrkhei ki dei ban shim ka jingkitkhlieh,” ka la bynrap.
