Shillong, Ïaïong 27
Ka Khun Hynñiewtrep National Awakening Movement (KHNAM) ka la kynnoh ba ka kompeni NESS, kaba na Assam bad ba la shah buh dak ïong da ka Khasi Hills Autonomous District Council (KHADC), ka dang ïashimbynta ha ka ban ïoh ki jingpyntrei ïa ki kam jong ka Sorkar bad kyntu ïa ka Council ba kan leh eiei mardor.
“Katkum ka jingkren u Chief Executive Member (CEM) ka Khasi Hills Autonomous District Council (KHADC) ha ki lad pathai khubor u la pyntip ba ka Council ka la buh dak ïong (blacklist) ïa ka NESS namar ba ka la pynkheiñ ïa ka Trading by Non Tribal Regulation 1954” ong ka kyrwoh khubor u Working President ka KHNAM u Bah Thomas Passah.
U kdew ba ka Trading Licence ba la ai ïa kane ka kompeni na ka bynta ka kam kontrak ha ka KV skul Laitkor ruh la dep ban pynduh noh, hynrei, ka KHNAM ka kam ba kane ka kompeni ka dang ïoh kam ha ka Jylla.
“Ngi la ïoh jingtip ba kane ka kompeni ka dang don bynta ha ka jingthep ‘tender’ ba la pynmih da ki tnad bapher-bapher” u la ong haba bynrap “Mynta kane ka kompeni ka la ïoh ruh ïa ka ‘tender’ ba la pynmih da ka KV Shillong Peak”.
U Bah Thomas u la ong ba ka KHNAM ka la dep ïakren ïa kane ka kam bad ka Council bad kyrmen skhem ba u CEM ka KHADC un leh eiei mardor pyrshah ïa kane ka kompeni
