Jowai, Ïaïong 27
Ka Seiñraij Kongwasan Chyrmang ka dei kawei na ki Raij kaba pynlong nyngkong eh ïa ka Behdeiñkhlam hapoh ri Jaiñtia bad ha ka 26 tarik Ïaïong ka la pynkut noh ïa ka lehniam Behdeiñkhlam ba shisien shisnem hapdeng ka jingiphuh iphieng.
Ha kane ka lehniam Behdeiñkhlam u Langdoh Kongwasan Chyrmang ryngkat kiwei ki shakri niam ka Raij kila pyndep ïa bynta jong ka lehniam haduh ban da poi ka sngi khatduh jong ka lehniam Behdeiñkhlam.
Ka Behdeiñkhlam ba la pyndep da ka Seinraij Kongwasan Chyrmang ka dei ka jinglehniam hashwa ba ki khun ka Raij kin hiar sha ki hali ki pyntha ban pynhap ïa u symbai u rynai, ban bha ban miat u kba u khaw ban dap ban biang ka ïing ka sem bad ban beh ïa ka khlam ka smej napoh ka shnong ka Raij.
Ka lehniam ha ka sngi pynkut ka sdang naduh ka por step da kaba pyndep ïa ka Chad Thyndai, Seh Bhang ha Khloo blai ryngkat ka nguh ka dem ka suit ka shor, ka jingshad ha Ïung Langdoh, ka jingpynkhein ‘Khnong blai’ bad ka jingpynhiar ïa ki ‘Charoh blai’ sha Aitnar.
Ki rot ki rong baroh kiba la wanrah ban pynphuh pynphieng ïa ka shad Behdeiñkhlam ki don haduh 7 tylli hapdeng ka jingkynud ki sur jong ka bom ka bhuri bad la pynphuh pynphieng bad pynshongshit ïa ka shad Behdeiñkhlam da ka jingïashim bynta lang ruh ki khun samla kynthei ha ka riam ka beit ba bun rukom.
Nalor ki khun ka Seinraij Kongwasan Chyrmang, la wan ban sakhi ruh da u MLA ka thaiñ Ma Lakhmen Rymbui, Dolloi ka Elaka Jowai Ma Puramon Kynjing, u President ka Seiñraij Chyrmang Ma Wol Shylla, u President ka Seiñraij Jowai Ma Hercules Toi bad kiwei kiwei ki nongïalam na ki Seiñraij bapher ka ri Jaiñtia.
