Shillong, Ïaïong 27
U Myntri ka tnad Revenue & Disaster Management, Bah Lahkmen Rymbui u la ong ba ka Meghalaya ka long kaba la khreh lada wan kino-kino ki jingjia ba ïadei bad ki jinglynshop mariang bad bthah ïa baroh ki bor distrik ban long kiba peitngor.
“Ka Sorkar Megha-laya lem bad ka kynhun ‘Disaster Management’ ki long kiba la khreh ban shimkhia ïa baroh ki jait jingjia bad kaba kham kongsan, kumba ngi tip mynta ba da ka jingïarap jong ki kor teknoloji, ngi lah ban tip lypa hashuwa ban jia kino-kino ki jingjia,” ong u Bah Rymbui sha ki nongthoh khubor ha ka Lah Sngi U Blei.
U la ong ruh ba watla um pat don ïa ka kaiphod halor ka jinglong-jingman na kylleng ka Jylla, hynrei la sdang ban pyntreikam ïa ki kynhun ai jingïarap ne ki ‘Response Team’.
“Ïa ki kynhun, la ka long na ka ophis SDO ne DC ha kylleng ka Jylla Meghalaya, la bthah ba kin shimkhia mardor lada mih kano-kano ka jingjia,” u la ong.
“To ngin kyrmen ba kin ym don kino-kino ki jingjia – hynrei ngi la bthah ïa baroh ki kynhun kiba khmih ïa ki jingjia lynshop mariang ban long kiba la pynkhreh,” u la ong.
U Bah Rymbui u la ban jur ba ka jingshimkhia mardor ban ai jingïarap haba don kino-kino ki jingjia ka long kaba la pynbeit ryntih bad la ai bor ïa ki bor distrik ban treikam laitluid.
“Ïa u District Magistrate la pynkup bor pura kum u Chairman jong ka tnad ‘Disaster Management’ ban peit bniah ïa ki kam kiba ïadei bad ka distrik. Kumta kam dei ïa ngi ha ka kyrdan jong ka Jylla ban peit ïa kita kiei-kiei baroh,” u la ong.
“Ki kyndon ba ïadei bad ka ‘Disaster Management’ ki la ai bor ruh ïa ki ‘District Magistrate’ ban leh ïa baroh kaba donkam,” u la bynrap.
Halor ki nongtrei bad ki jingdon-jingem, u Myntri u la ong ba ka Jylla ka biang haba ïadei bad kane ka liang.
“Ngi la pynkhreh bha, la ka long ki nongtrei, namar ka jingpynkhreh ïa ki jingjia lynshop mariang kam dei tang na ka Sorkar. Ngi sngewkmen shi kat dei ba ki briew ki ai ka jingïatreilang kaba pura bad ngi don ki kynhun naduh ki ‘Home Guard’, ki pulit, bad na ka tnad pynlip ding bad kine ki kynhun baroh ki long kiba la pynkhreh,” u la ong.
“Kaba kongsan eh, nga sngewkmen ba ki paidbah ka Meghalaya ki ïatreilang bha bad ki bor ba dei khmih haba wan jia kino-kino ki jingjia,” bynrap u Bah Rymbui.
Haba pynshai ba ka jingkhmih bniah ïa ki jingjia lynshop mariang ka ïaid kham palat ban ïa ka jinglong-jingman suiñbneng, u la ong, “Haba ngi kren shaphang ka jinglynshop, ngi hap ban peit la kane ka kynroh ne lum ki skhem ne em, hato lyngba ka jingpom pathar ïa ki khlaw ka ktah ïa ka jingpynïaid ïa ki kam ba ïadei bad ki jingjia lynshop – ka dei ka jingkyllum lang jong baroh.”
“Haba ngi kren shaphang ka jingjia lynshop, kam dei tang ïa u slap, kam dei tang ïa u jumai ne kino-kino, naba ki don ruh ki jinglynshop ba pynlong da u briew ne ki jingjia aksiden kiba lah ban jia,” u la ong.
Halor ka jingbei pisa bad ka jingjubab ha ka por jong ka jingjia lynshop, u Bah Rymbui u la ban biang ïa ka rukom treikam ba la pynïaid ryntih da ki bor synshar.
“Kumba nga la ïathuh ïa phi, ngam don ïa ki rekod, hynrei u Deputy Commissioner u la pynkhreh pura ban khmih ïa kane. Lada don ka jingduna pisa, ki lah ban thoh beit sha ka Jylla khnang ba yn leh ïa kaba donkam,” u la ong.
