Shillong, Ïaïong 27
U President ka All Khasi Meghalaya Tourist Taxi Association ( AKMTTA ) u Bah Ricaldinus Dohling u la ong ba ka jingïeng kulmar kat shaba lap ki kali Assam sha ki surok ha Nongbah Shillong ban ap ïa ki nongleit jingleit, ka pynduh kamai ïa ki nongñiah kali kiba dei trai jylla kiba ap na stand kiba ap laiñ.
U Bah Ricaldinus u la kyntu ïa ki pulit ban shimkhia lem ban peit ïa ki kali Assam kiba ïeng kulmar ban thep nongleit jingleit sha Assam, namar lada ailad ki kali na jaka ap laiñ kim ïoh passenger shuh.
U la ong ba ki kali Assam kiba ïeng harud surok ym don ba phah mano-mano hynrei ki kwah ban ïeng tuh hi namar kim kwah ban leit ïeng ha jaka ap laiñ namar ki hap ban siew ka bai parking ka bai thep nongleit jingleit. Ha kaba ïadei bad ka jingïohlad ban rung ki kali tourist kiba nabar hapoh ka Jylla, ym don ba peit ym don ba khmih bad da ki hajar ki kali kiba nabar bad duna ki kali trai jylla, ka jingïohrung ka dei ka jingbym lah ban tehlakam.
U la ïathuh ba ki don ki kali na Delhi, na Bihar kiba wan ban kamai shapoh ka Jylla bad kane ka dei na jaka talasi ba kim lah ban pyrkhing.
Namarkata, u la kyntu ïa ka Sorkar ba ka dei ban shimkhia ïa ka jingrung jingmih ki kali kiba nabar, namar ki nongkamai ki dei tang ki nongpeit kai ïa ki kali kiba nabar.
“Lada ka tnad pulit kam lah ban tehlakam ne ban weng ïa ki jingeh jong ki nongñiah kali kamai tourist, ngim banse ban leh hi ïa ka kamram ban beh ïa ki kali Assam kiba ïeng pathar kat sha ba lap,” la ong u Bah Ricaldinus.
