Shillong, Ïaïong 27
U Myntri ka tnad Reve-nue & Disaster Manage-ment, Bah Lahkmen Rymbui u la pynpaw ïa ka jingsngewkhia halor ka jingtwa bad jinghap maw kaba dang shen – kaba la ïalam sha ka jingkhlad noh jong 2 ngut ki briew, hynrei u la ong ba u sngewhun ïa ki sienjam ba la shim da ka Sorkar ban pynkloi ha ka ban pyndep ïa ka projek surok Shillong-Dawki.
“U SDO ka Pynursla u la dep pynmih ïa ka jingmana bad jingpyrkhing na ka por sha ka por bad kaei kaba jia ka long kaba sngewsih haduh katta-katta,” la ong u Bah Rymbui ha ka Lah Sngi U Blei.
U la kdew ruh ba la dep ban hukum ban ïaid shakhmat ka jingtohkit halor katei ka jingjia.
“Nga sngewkmen shibun ba ka Sorkar ka la bthah ïa u SDO ban tohkit halor kitei ki jingjia,” u la ong.
Haba ïadei bad ki kam ki ban pynduna ïa ka jingktah ha katei ka surokbah, u Myntri u la ong, “Dang shen nga la ïohi ruh ïa ka tnad kaba pyntreikam ïa kane ka surokbah khamtam ka Shillong-Dawki ba ki la shimkhia ha ka ban khmih bniah ïa kiei-kiei kiba lah ban wan jia, dei na kata ka daw ba ki la pynpra noh ïa kito ki lum rit ha Mawlieh.” Haba kylli, u Bah Rymbui u la ong, “Ngam sngewhun namarba ki jingim briew ki la duh ei hynrei nga sngewhun ïa ki sienjam ba la shim da ka Sorkar ban peit haba ïadei bad ka jingpyndep ïa ka surok bad kaba kham kongsan ban khmih ba kan ym don kano-kano ka jingjia ba sngewsih.”
“Nga sngewsih shi kat dei ban ïohi ïa kum kine ki jingjia kiba wan jia,” u la ong.
U la kyntu ruh ban long kiba husiar haba ïadei bad ki projek ban wan.
“To ngin kyrmen ba baroh ki tnad pyntreikam bad ka Sorkar ruh ki dei ban shimkhia ba kum kine ki jingjia kim dei ban jia haba pyntreikam ïa kino-kino ki projek ha ka Jylla Meghalaya,” bynrap u Bah Rymbui.
