Shillong, Ïaïong 27
Ki pulit jong ka North Garo Hills kila ïoh ban pynpulom noh ïa ka jingpyrshang rahbor bad ïoh ban pynlait im ïa uwei u nongkhaïi tang hapoh shiteng kynta ba u shah rahbor hadien ba ki la ïoh jingtip ha ka 25 tarik mynta u bnai.
Katkum ka kyrwoh ba la pyllait da u Superintendent of Police ka North Garo Hills District ha ka sngi Nyngkong, la ong ba kane ka jingjia kala jia ha ka 25 tarik mynta u bnai ha ka por 3 baje janmiet ha ka shnong Bolsong.
U SP u la ong ba ki pulit ka thanad Bajengdoba kila ïoh pdiang ka khubor ba thikna ha ka por kumba 3 baje janmiet ba ki don ki briew bym lah ban ithuh kiba la rahbor ïa uwei u nongkhaïi ha kawei ka kali Maruti Ertiga kaba don ïa u registration number ML08-K-5869 na ka thaiñ Bolsong.
Mar ïa ïoh jingtip, ki pulit mar mar ki la pynïeng ïa ka jaka talasi kali ha Mansinggre bad dei ha ka por 3:30 janmiet, ba ïa kane ka kali la ïoh ban bat noh da ki pulit bad ha ka por ba la pynlong ka jingtalasi, la lap ïa une u nongkhaïi uba shah rahbor hapoh ka kali bad ha kaba la ïoh pyllait noh khlem pynslem.
Ha ka jingtohkit, la lap ba lai ngut ki runar kila bat ïa une u nongkhaïi ha ka surok Bolsong-Agia da kaba pynbor ïa u ban ïeng bad hadien kila kurup jubor ïa ka arshaka bad mobile phone, nalor ka jinglute ïa ka song pisa ba T.30,000. Kine ki runar kila patan jubor ïa u hapoh ka kali katba uwei pat u la ñiah ïa ka arshaka. Une u nongkhaïi u la ïoh hylla, kaba la ïoh sngew da ki paidbah kiba la pyntip pat mar mar sha ki pulit.
Ki pulit ki la ong ba ïa kine ki briew ba la rahbor, la lah ban ithuh bad la sdang ka jingtohkit.
La ong ba ha ka jingtohkit, uwei na kiba shah kem u la kam ba u don ka jingïadei bad ka sengbhalang kaba la tip kum ka United Garo People’s Forum.
Halor kane, ki pulit ki la register mukotduma hapoh ka thanad Bajengdoba ha ki kyndon bapher bapher ka Bharatiya Nyaya Sanhita (BNS) bad ka jingtohkit mynta kala ïaid shakhmat.
