Shillong, Ïaïong 28
U khlieh nongïalam ka Congress bad MP barim ka Shillong, Bah Vincent H. Pala u la ong ba u dang pyrkhat na ka bynta ban ïakhun ha ka ilekshon shiteng samoi ban wan sha ka Shillong Lok Sabha, bad la khmih lynti ba ka seng kan pynbeit ïa u kyrtong jong ka hapoh ka 15 tarik u Jymmang.
Katei ka shuki (MP) ka la sah thylli hadien ka jingkhlad noh jong u MP barim ka VPP, u Dr. Ricky A.J. Syngkon ha ka 19 tarik u Rymphang.
U Bah Pala u la wan ba-ar hadien jong u Dr. Syngkon ha ka ilekshon 2024 sha ka Lok Sabha.
“Nga tharai ba ngim don mano-mano ruh. Nga hap ban ïakhun hynrei ka jingïalang (ban shim ïa ka rai bakhatduh yn dang hap ap). Ha ka sien ba la dep, ngi la don ka jingïalang bad la phah ïa ka rai ba la mynjur sha Delhi, ba nga dei ban ïakhun hynrei ngim shym la shim ïa ka jingai jingmut jong baroh ki ‘Block’ bad ki distrik,” ong u Bah Pala sha ki nongthoh khubor ha ka Sngi Ba-ar.
“Nga tharai ngin sa ïakynduh biang lehse hadien ka 10 tarik u Jymmang, nangta ngin sa rai,” u la ong.
U Bah Pala u la ong ba ïa ka jingtyrwa kaba hashuwa kaba ai jingmut ïa ka kyrteng jong u la phah sha ka AICC, hynrei u la pan por.
“Ka la don kawei ka jingïalang, ha kaba ki la tyrwa ïa ka kyrteng jong nga bad ïa kata la phah sha Delhi hynrei ha katei ka por nga la ong ïa ki ban ap namarba nga hap ban ïakren bad ki bahaïing hasem bad ki paralok bad kumta to ngin pynlong biang sa kawei ka jingïalang,” u la ong.
Watla u la kdew ba kiba bun ki nongïalam ka seng ki kwah ba un ïakhun, u la ban jur ba kiwei ruh ki lah ban don ka jingkyrmen lada ïakhun.
“Kumta ngin sa don biang ka jingïalang bad kyrmen ba kin lah ban rai hynrei kam mut ba dei tang ma nga, lehse kiwei ruh. To ngin kyrmen bad ngin sa peit hynrei kiba bun na ki, ki la ong ïa nga ban ïakhun”, la ong u Bah Pala.
U la batai ruh ïa ka rukom treikam ka ban ïaid shakhmat.
“Ym pat lah ban pynbeit na ka bynta ka Shillong, ynda ki la rai na ka bynta u kyrtong, ngi hap ban phah na ka Jylla sha ki bor ba halor bad hangta, kin don ki bor pynïaid ilekshon ki ban peit ha baroh kawei ka ri India – kumta kin sa rai haba ïadei bad ka kyrteng,” u la ong.
“Kumba long mynta, ngim pat phah wat ïa ki kyrteng ruh. Ngi dang phah tang ïa ka rai kaba la mynjur hynrei ngi hap ban phah ha ka rukom kaba biang, ym tang na ka bynta ka Meghalaya hynrei bun kiwei pat ki Jylla kum ha Assam namarba kin sa don ki ilekshon shiteng samoi,” u la bynrap haba kdew ïa ki MP kiba lah ban iehnoh kam ynda ki la jop ïa ka ilekshon MLA kaba dang shu dep shen.
“Wat ïa ka jingtyrwa ruh, ngin sa shong biang mynta bad ngin sa khmih bniah bad pyrkhat namarba ngi hap ban don ïa ka buit treikam na ka bynta kane,” la ong u Bah Pala.
Haba kylli ïa ka por, u la jubab, “Hapoh ka 15 tarik u Jymmang, ngi la dei ban lah ban shim rai (ïa u kyrtong na ka bynta ka ilekshon shiteng samoi).”
Haba batai ïa ka jingbym kwah jong u ha kaba nyngkong, u Bah Pala u la ong, “Ha ka sien kaba la dep ngi la ïakynduh, ki District President na ki 36 tylli ki ‘Block’ bad bun ki nongïalam ka seng da kawei ka sur ki la ai jingmut ïa ka kyrteng jong nga hynrei ha kata ka kynti ngam shym la ong hooid namarba nga hap ban ïakren bad ki dkhot jong ka longïing jong nga naba nga la rem ïa ka ilekshon bad ha kata ka por nga la rai ba ngan ym ïakhun ïa ka ilekshon.”
U la ong ba ka seng ka la pynkhreh ïa u Secretary ka MPCC, Bah Manuel Badwar na ka bynta ka ilekshon bah ban wan.
“Nga la ïalam ïa u Secretary ka MPCC, Bah Manuel Badwar sha baroh ki jaka ban ïakhun ïa ka ilekshon MP ban wan namarba ngim poi pyrkhat ba kan don ka ilekshon shiteng samoi. Da ka jingwan jong ka ilekshon shiteng samoi ki la ong ïa nga ban pyrkhat biang, dei na kata ka daw ba nga la ong ïa ki – ai ba ngan pyrkhat biang ïa kane,” u la ong.
Halor ka jingtyllun jong ki jingpynïaid kam, u Bah Pala u la ong ba ka Congress ka la pynbha bad kyntiew ïa ki jingïalang jong ka seng.
“Ngi la pynbeit ïa baroh ki District President, ha kajuh ka por ngi la pynbeit ha ka kyrdan jong ka ‘Block’. Ha kane ka shibnai ba la dep, ngi don ha ka kam. Ngi ju don ka jingïalang man ka sngi,” u la ong haba kdew ïa ki jingïalang ba dang shen ha Mylliem bad Ri-Bhoi.
