Shillong, Ïaïong 28
Ka Awaken India Move-ment (AIM) ha ka sngi Ba-ar jong ka taïew, ka la pynlong ïa ka jingïalang paidbah ha khmat u motdur u Kiang Nangbah, hajan ka Civil Hospital Shillong halor ka jingïeng pyrshah haba ïadei bad ka jingpynkheiñ bad shah kyntait jingïarap lyngba u Aadhaar.
Ha kane ka sngi ki la don da ki phew ngut ki paidbah naduh ki longkmie, ki longkpa haduh ki samla kiba la wan poi ha katei ka jingïalang.
Ki nongïalam ka AIM ha ryngkat ki paidbah kiba bun ki la thmu ban ïaid da ka kjat na jaka pynlong jingïalang ban pynpoi biang ha kajuh ka jaka hynrei ki magistrate ki la khang pyrshah ban nym shah ban ïaid paidbah kat bym pat ïoh ka hukum kaba biang.
Hadien kumba katto katne por eiei, ki bor ba dei khmih ki la shah ïa ki paidbah bad ki nongïalam ka AIM ban ïaid kjat bad rah plakad tang na Barik bad wan phai biang sha kajuh ka jaka, ym ban leit ïaid shaduh sha Secretariat.
U Bah Banshai Marbaniang, Chairman ka Awaken India Movement u la ong ba lyngba ka Aadhaar bad lada la dep ban pynïasoh bad ka Bank Account kin sa tip lut katno ka pisa ba don ha ka account jong ki briew.
“Ngi pynpaw ka jingsngewsih ban ïohi ba ki paidbah nongshong shnong ki la shah pynbor ban shon ïa u Aadhaar tang ban ïoh ïa u khaw rashon,” la ong u Bah Banshai Marbaniang haba kren ha ka jingïalang paidbah.
U la ong ba u Aadhaar u wan da kawei pat ka kyntien, kaba ka ‘data’ jong ki paidbah naduh ka durkhmat bad ha baroh kawei ka met, la lah ban wad da kaba suk namar ka don ka pyrthei AI.
“Ha ka kyrteng jong nga jong phi la lah ban lap haba la dep pynïoh ïa u Aadhaar bad haba don katno ka pisa ha Bank Account ruh la suk ban lap. Kumta ka jingïeng jong ngi ha ki rynsan paidbah, ka long ban ïoh ïa ka jinglaitluid ha ka Ri India, ba ka hok jong ngi ka dei ban long kaba laitluid ba ngin nym shah pynbor ban shon ïa u Aadhaar,” la bynrap u Bah Banshai Marbañiang.
Ha kane ka sngi la ïoh ka jingkren na ki longkmie, ki longkpa ruh kumjuh.
