Shillong, Ïaïong 28
Ka Khasi Authors Socie-ty (KAS) kan sa phah da ka jingthoh ban kyntu ïa ka Sorkar Jylla ba kan thoh biang sa shisien sha ka Sorkar India lyngba ka tnad kam pohïing ba kan ithuh noh ïa ka ktien Khasi ha ka Khyrnit kaba Phra hadien ba ka Sorkar Jylla ka la ithuh ïa ka ktien Khasi kum ka ktien Sorkar.
Haba ïakren bad ki nongthoh khubor, u Dr. DRL Nonglait uba dei u President ka KAS u la kyntu ïa ka Sorkar ba ka dei ban kynthup lang ïa ki nongkitkam ka KAS haba shna ïa ki kyndon ban wanrah ha ïingdorbar ban pynlong aiñ khnang ban bit ban biang haba la ithuh ïa ka ktien Khasi kum ka ktien Sorkar.
U la pynpaw ka jinsngewkmen ba naduh ba la ïoh ïa ka Jylla lajong kata hadien 54 snem ka Sorkar ka la ithuh ïa ka ktien Khasi hadien ba u Lat ka Jylla u la ai jingmynjur ha ka 27 tarik mynta u bnai.
“Ngi kwah ba ka Sorkar kan pyndonkam ïa ka ktien Khasi ha kiba bun ki kyrdan wat ha ka kyrdan Directorate namar ha ka Ordinance ka kdew tang ïa ki hynñiew tylli ki district,” u la ong.
Shuh shuh u la ong ba ka Sorkar ka dei ban pynlong biang ïa ka klas ban ai jinghikai online ïa ki nongtreikam Sorkar haduh ki kyrdan IAS ki bym pat nang ïa ka ktien Khasi khnang ban suk haba ki treikam.
U Dr. DRL Nonglait u la kyntu ïa ka Sorkar ba ka dei ban thaw noh ïa ka tnad kyrpang ban pynkylla ïa ka ktien Khasi ha ki tnad bapher-bapher khnang ban pynurlong pura ïa ka ktien Khasi kum ka ktien Sorkar.
