Shillong, Ïaïong 28
Ka ïingbishar ha Shil-long, kala ai jamin ïa ka Sonam Raghuvanshi, kaba la shah kynnoh ban donkti ha ka jingpynïap ïa la u kurim, u nong-khaïi na Indoor (L) Raja Raghuvanshi, hadien ba ai rai ba ki pulit kim shym la lah ban pyntip bha ïa ki nongrim halor ki daw ba kem ïa ka.
Kane ka jingïoh jamin jong ka Sonam ka la paw ruh ba dei namar ka jingbakla jong ki pulit ha ka ban pynngat kyndon por ba la kem ïa ka bad ba kim shym la lah ban pyntip shai ïa ki nongrim halor ki daw ba la kem ïa ka.
Ha ka hukum ba pynmih ha ka sngi Nyngkong ka 27 tarik, haba pynwai ruh ïa ka jingkyrpad bah jamin, ka ïingbishar Additional DC (Judicial) DR Kharbteng, ka ong ba ki jingduna ha ka rukom pynïaid ïa ki kam kaba long pyrshah ïa ka riti synshar katkum ka Article 22(1) bad ka lah ban ktah ïa ka nongrim ban ïada ïalade da ka nongshah kynnoh.
Ka ïingbishar kala kdew ïa ki jingdkoh kiba bun kiba lah ban ïohi na ki kot ki sla kiba ïadei bad ka jingkem ïa ka.
Katba ïa ka ejahar ha Sohra PS Case NO 7/2025 la register hapoh ka kyndon 103 (1)/238(a)/309(6)/3(6) jong ka BNS, ka “jingpyntip ïa ki nongrim ka jingkem” bala pynngat ïa ka Sonam la kdew da ka kyndon 403 (1) ha ka jaka jong ka 103(1).
“Haba pule bniah ïa ka Annexure 8 ha katei ka format bala ai sha ha u nongujor, ym shym la buh kawei ruh ka dak ha ka ‘check box’ ban pynpaw ïa ki jingpynngat kyndon (charges) pyrshah ïa ka nongujor,” ong ka hukum.
“Wat ki kyndon jong ka aiñ kaba la kdew ha ka Sohra PS Case No 7/2025 u/s 403(1)/238(a)/309(6)/3(6) BNS.”
U Judge u la kyntait ïa ka jingpynksan nia jong u nongïasaid ba ka dei ka jingleh bakla haba pynkhreh ïa ki kot ki sla, haba pynpaw ba kum kine ki jingbakla kila paw ha kiba bun tylli ki kot ki sla.
Ka ïingbishar ka la ong, “Ha baroh ki kot ki sla ba ïadei bad ka Sonam Raghuvanshi, naduh ka check list ban pynshisha ïa ka jingkem, ka memo ba kem, inspection memo, ka jingpyntip ïa ka hok jong ka briew ba shah kem, ka pasoh jong ka case diary, ka kyndon bala kdew ha baroh ki kot ki sla ka long….u/s 403(1)”.
“Ha ka jingpeit bniah, kan pyni ba ka nongmudui kam shym la ïoh jingtip halor ka jingkynnoh ba hap hapoh ka kyndon 103(1) BNS,” kala bynrap.
Ka ïingbishar kala pynïapher ïa kane ka case na ka Darshan Case ha kaba ki nongshah mudui kila ïoh ïa ka jingtip halor ki nongrim ba kem ïa ki da ka jingbatai da ka ktien ha ka por ba kem bad la pynbud pat mar mar da ka jingthoh, kumta ïa ka jingdonkam hapoh ka kyndon 50A CrPC la pyntreikam pura”.
Ka ïingbishar ka shem ba ki pulit kim shym la ai ïa ki jingtip kaba shai halor ka nongrim ka jingkem sha ka nongmudui bad bynrap ba kane ka buh ïa ka nongmudui ha ka umdum ba kan lah ban ïada ïalade.
Kala pynpaw ruh ba “kam don eiei ha ka jingthoh ban pyni ba ïa ka nongmudui la mihkhmat da u/ka nongsaid aiñ ha ka por ba la ïalam nyngkong eh ïa ka sha ïingbishar ha Ghazipur”.
Haba kdew ïa ka rai ka Supreme Court ha ka mukotduma u Vihaan Kumar bad ka hukum ka ïingbishar Meghalaya High Court ha ka Labius Areng, ka ïingbishar ka shim “Halor ki jingshisha bad ki jinglong jong kane ka mukotduma, ka ïingbishar ka sngewskhem ba ka nongmudui ka la lah ban pynksan ïa ka nongrim jong ka namar ba kam shym la shah pyntip shai halor ki nongrim ka jingshah kem jong ka”.
“Namar kata, ka nongmudui ka don ïa ka hok ban shah pynlait noh da ka bah jamin,” hukum ka ïingbishar.
Ka Sonam Raghuvanshi kaba la pynlut haduh 10 bnai ha District Jail bad Correctional Home, Shillong naduh ba kem ïa ka ha ka 9 tarik Jylliew, 2025 na Ghazipur, Uttar Pradesh, yn sa pynlait noh da ka personal bond ba T.50,000 ha ryngkat ki ar tylli ki surety kiba dei ha kajuh ka dor.
Ka ïingbishar kala bthah ïa ka Sonam ba kam dei ban jah rngai lane pynjulor ïa ki sakhi satar, ba ka dei ban wan mih sha ïingbishar ha man ki sngi ba buh ban bishar, ba kam dei ban mih shabar u pud u sam ka ïingbishar, lait noh sa tang da ïoh jingbit, bad ba ka dei ban pyntreikam ïa ka personal bond ba T.50,000 ha ryngkat ki surety ba katjuh ka dor.
