Shillong, Ïaïong 28
U President ka Meghalaya Pradesh Congress Committee (MPCC) u Bah Vincent H Pala u la kynthoh ïa ka Sorkar Jylla ba ka la khanglad ïa ka roi ka par ha ka ban shna ïa ka surok, da kaba kynnoh ba ka pisa na ka Sorkar Pdeng kam pynkylla sha ka roi ka par ha ka koit ka khiah, ka pule puthi, ne kiwei-kiwei ki bynta.
“Phi ïohi ïa kaei kaba ki ïoh pisa na Delhi, namar ba kiba bun ki Myntri ki dei ki kontraktor, kumta kin phah tang sha ki surok, kam don ei-ei ha ka pule puthi, ka koit ka khiah, kiwei-kiwei ki jaka ai jinghikai kiba ki la leh”, la ong u Bah Pala haba kren sha ki nongthoh khubor.
“Kumta ka jingroi kam mut tang ïa ki surok.” U la ong.
U Bah Vincent H Pala u la kynnoh ruh ba ka pisa ba la pyllait da ka Sorkar Pdeng kam poi sha ki bynta ba kongsan jong ka imlang sahlang.
“Haba wan na Delhi ka leit sha ki kontraktor, ki Myntri bad nangta ka kut noh hangta, hynrei ngim pat ïohi ïa ki hospital ba la tei, ngim pat ïohi ïa ki skul thymmai bad phim ïohi ïa ki Skulbah thymmai bad phim ïohi ei-ei”, u la ong.
U Bah Vincent u la ban jur ba ka jingroi ka dei ban long kaba kham jylliew. “Kumta ha ka jingïalang, ka jingpynroi ka hap ban long kaba kynthup lang, kam dei tang na ka bynta ka jingpynroi ïa ka surok,” u la bynrap.
