Mawkyrwat, Ïaïong 28
Ka jingwan kynsan jong ka ‘eriong langthari ha ka step jong ka 27 tarik mynta u bnai ha ka por kumba 2 baje haduh 4 baje eiei, ka la jynrat naphang ïa ki ïing ki sem ha ka shnong Maw-thabah bad Phudumiap bad ha katei ka jingjia ki la don haduh 9 tylli ki ïing kiba la shah pynjulor.
Katkum ki tyllong khubor ba la ïohlum na ka ophis jong u BDO ka Ranikor Block la ïathuh ba 5 tylli ki ïing kila shah ktah ha ka shnong Mawthabah bad 4 tylli ha ka shnong Phudumiap, ha kaba ka ‘eriong ka la lied naphang ïa ki tnum bad ha katei ka jingjia kam shym la don kano-kano ka jingmynsaw ne jingjia ba sngewsih.
Shuh shuh la ïathuh ruh ba ha katei ka jingjia kumba 37 ngut ki briew ki la shah ktah bad na ka liang ka ophis u BDO ka Ranikor Block, ki la ai jingtip wut wut sha ka ophis u Deputy Commissioner ka South West Khasi Hills District khnang ban ïoh ïarap ïa kitei ki longïing kiba la ngat ha katei ka jingjia shah pynjulor ha ka bor mariang.
