Shillong, Ïaïong 28
U khlieh nongïalam ka Congress, Bah Vincent H. Pala ha ka Sngi Ba-ar u la ong ba ka jingsngew ki paidbah ka noh biang sha ka Congress hadien ba ki briew ki la mad ïa ka synshar-khaddar hapoh jong ka Voice of the People Party (VPP) bad ka National People’s Party (NPP).
“Hooid, namarba ki briew ki la sngewthuh mynta. Ha kaba sdang, ki briew kim don jingshaniah naba ki pyrkhat ba lehse ka Congress kan sa duh sa dam noh, hynrei mynta ki briew ki la sngewthuh ba hadien ba ki la mad ïa ka VPP ha ka Jylla bad ha ka District Council bad ha Delhi, kumta ki briew ki pyrkhat biang bad kylla na kaei kaba ki don ba ngi donkam ïa ka seng kum ka Congress naba ka Congress ka la dep pyni kam lypa,” la ong u Bah Pala.
Une u nongïalam ka Congress u la ong ba ki bynta bapher-bapher ki mad ïa ka jingshah ban beiñ bad ka jingeh ha ka ïoh ka kot.
“Kata ka dei ka sur jong u paidbah. Ha ka por ba ka Congress ka don ha ka bor, baroh ki don ka lad ban kamai hynrei mynta, nga tharai naduh ka jingtih shyiap haduh kito ki briew kiba rit, kiba die jingdie harud surok bad haduh ki nongñiah taksi, mynta phi ïohi ba man ka por ka don ka jingïakhih bad man ka por ka don ka jingshah ban beiñ ïa kito ki briew,” u la ong.
“Bad naduh ki briew kiba trei ïa ki kam khaïi dieng bad dewïong bad mawshun, ka jingshah ban beiñ ka long shaba palat ba tang katto-katne bynta jong ki briew ki lah ban leh ïa ki kam khaïi-pateng naduh ki kontraktor bad wat ki nongrep kumjuh, kim ïoh ïa kaei kaba ki dei ban ïoh,” u la ong.
U Bah Pala u la bynrap, “Kumta mynta ki briew ki la sngewthuh ha ka por ba don ka Congress, ka pisa ka don ha ka pla jong baroh, heh ne rit, duna ne bun hynrei ka pisa ka don ha ka pla jong ki. Hynrei mynta ngi don ha ka kyrdan ka bym itynnad.”
U Bah Pala u la ong ba ki jingleit-jingleit jong u ba dang shen sha ki jaka nongkyndong ki pynpaw ïa ka jingeh ha ka ïoh ka kot kaba nang kiew.
“Nga la ïaid na kawei ka shnong sha kawei pat, nga la leit sha ki jingïaseng Balang, bun kiba ong ba ki briew ki la nang duk ha ki shnong ki thaw,” u la ong.
“Kumta ngi don kumba 3400 tylli ki shnong ha kine ki konstitwensi bad ngi don haduh kumba 2300 tylli ki jaka thep ‘vote’, ka long kaba eh ban poi sha man la kawei-pa-kawei ka jaka thep ‘vote’ hynrei ngi la pyrshang bad nga lah ban ïohi ba bun ki briew ki la duh jingkyrmen khamtam kito kiba phah pule ïa ki khun jong ki bad ba ki khun jong ki kim ïoh kam namar ka jingkyrduh kam ka jur bha bha ym tang ha ki kam Sorkar hynrei wat ha ki tnad treikam shimet – kumta ka pla tyngka ki briew kan sa tyrkhong suki-suki.”
Kumban shu kdew hangne, ka VPP ka don ïa ka jingbun paid ha Khasi Hills Autonomous District Council bad ka la jop ïa ka ilekshon sha ka Shillong Parliamentary konstitwensi ha u snem 2024. Ka NPP ha kawei ka liang ka ïalam ïa ka Sorkar Synrop ha ka Jylla.
