Shillong, Ïaïong 28
U President ka Megha-laya Pradesh Congress Committee (MPCC) Bah Vincent H Pala ha ka sngi Ba-ar u la kam ba kiba bun ki briew kynthup ruh ïa ki heh ophisar bad ki MLA barim, ki la pynkhreh ban rung sha ka Congress ha kaba kut jong une u snem.
“Ha kaba kut jong une u snem, kiba bun kin sa wan pynïasoh bad ka Congress. Ki don bun ki paralok, kiba la pynpaw ba ki kwah ban rung Congress,” ïathuh u Bah Pala ha ki nongthoh khubor.
U la ong ba ki don katto katne kiba ym pat lah ban wan shakhmat namar ba ki dang bat ïa ka kyrdan ka jong ki.
“Ki don katto katne kiba dang dei ki nongtrei Sorkar, ki don katto katne kiba dang don bad kiwei ki seng saiñpyrthei, kumta ha kaba kut jong une u snem, kiba bun kin sa pynïasoh lane ki lah ban rung hadien ba kut ka mang tyngka ha u snem ban wan, naba bun ki dei ruh kiba trei kum ki kontraktor, ha kaba kim pat kwah ban pynpaw ïalade bad kam pat dei hi ruh ka por hynrei ki dei kiba la trei lang bad ngi.”
U Bah Pala u la ong ba ka seng ka la sdang ban sakhi ïa ka jingkyrshan kaba thymmai ha kylleng ki district.
“Nga la ïohi ba ka la don ka jingkiew ha ka jingshaniah ha ka Congress khamtam ha Rilum Garo, ha Ri Bhoi bad Rilum Khasi, ngi hap ban trei shitom ha Rilum Jaiñtia. Namarkata, ngi sngew ba ka Congress kan sa lah ban leh bha ha ka ilekshon ka ban wan,” u la ong.
Haba kylli mano kita ki ban sa pynïasoh, u la ong, “Ki don katto katne kiba dei ki ophisar IAS bad IPS, ki ban sa ïasoh bad ngi.”
U la kynthoh tyngeh ruh pyrshah ïa ka jingkam jong ka BJP ha ki por kiba la leit. Ha ka sien kaba la leit, ka BJP ka la ong ba ki don bun ki MLA ki ban pynïasoh bad ka hynrei khlem don uwei ruh,” ong u Bah Pala.
