Shillong, Ïaïong 28
Uwei u nongñiah kali kamai taksi uba la kren beiñ bad kren tohmet ïa ka Kong Bertina, kaba don ha ki jingduna ha ka bor ïohi, ha ka 28 tarik u Ïaïong 2026, u la wan sha khmat ban panmap markhmat ïa ka jingkren beiñ jong u dangshen.
Ka jingkren beiñ jong une u nongñiah kali kamai kadei hadien ba ka Kong Bertina ka la phah sangeh ïa ka kali jong u ban shong, hynrei u la pynphai ktien kylla da kaba ong ba um ju kit ïa ki briew kiba don jingduna.
Kumta da ka mynsiem ka jingsngewsih bad ïa ka jingbakla ha ka ktien ka thylliej, une u rangbah ba ñiah kali kamai u la wan sha Nongthymmai Beat House kaba la shah khot ha ki pulit bad u la panmap markhmat ïa ka Kong Bertina, da kaba ong “Sngewbha map ba nga la ïoh kren bakla ïaphi”.
U la panmap ruh ïa baroh ki paidbah halor ka jingkren beiñ ïa ka Kong Bertina bad kumjuh ruh ïa ka Association.
Na ka liang ka Kong Bertina ka la kloi ban pdiang ïa ka jingwan panmap u ne u rangbah, da kaba ong ba baroh ki briew ki don ka jingduna hynrei ka jingbakla jong u ne u bah kan long ka nuksa kaba bha sha kiwei pat kiba ñiah kali kamai.
Ka Kong Bertina ka la ai khublei ïa ka Association kaba la shimkhia ban wad ïa une u Rangbah u ba la kren beiñ bad kaba long ruh ka nuksa kaba bha bad ka jingsneng ïa kiwei pat ki para nongñiah kali kamai ba kim dei ban ñiew shilliang ne ban pyrkhat bakla ïa ki briew kiba don ha ki jingduna ha ki dkhot met.
Ki nongïalam ka East Khasi Hills Local Taxi Welfare Association, ki la pynpaw ïa ka jingsngewkmen ba ka Kong Bertina ka la kloi ban pdiang ïa ka jingpanmap jong u rangbah ba la kren beiñ.
Ka Association ka la kyntu jur ïa baroh ki paidbah ba lada ki shem ïa kum kine ki jingshah kren beiñ ha kiba ñiah kali kamai, ki dei ban mih beit shakhmat khnang ba ka Association kan wad ïa kum kita ki briew.
Ka Association ka la maham ruh ba lada ki lap ïa kum kine ki briew kiba kren beiñ ïa ki paidbah ba shong kali kin sa shim ka sienjam kaba tyngeh nangne shakhmat.
