Shillong, Ïaïong 28
Ka Sorkar Jylla kala pynsangeh noh ïa ka jingthmu ban shna ïa ka surok Fly-Over na Rilbong sha Barik Point bad ha ka jaka jong kane, kan shna noh da ka surok 4-lane, kaba dei ka jingai jingmut jong ki bor shipai kiba kdew ïa ka jingshngaiñ bad ka jingïada.
Haba pyntip ïa kane ha ka sngi Ba-ar, u Symbud Myntri Rangbah ka Jylla u Bah Prestone Tynsong u la ong, “Na ka liang ka Sorkar, ngi ruh ngi kwah ïa ka surok fly-over na Rilbong sha Barik Point hynrei, hadien ka jingïakren bad ki bor shipai, ki bor shipai kila ai jingmut ïa ngi ban shna noh da ka surok 4-lane namar ka jingshngaiñ. Kumta, kan bha ban shna noh da ka surok 4-lane ha ka jaka ka fly-over”.
U Bah Prestone u la ïathuh ba ïa kane ka rai la shim hadien ka jingïasyllok bad ki agency bapher bapher.
U la ong, “Ta ka daw ngi la shim ïa ka rai da kaba ong ba to ngin ïa pynlong ïa ka jingïajurip lang na ka tnad PWD, ki bor District bad ruh na ka NHIDCL lem bad ki bor shipai.”
Halor ka jingïaid ki kam ba ïadei bad ka projek 4 lane, u Bah Prestone u la ong ba ka jingïaid sorjamin kala sdang.
“Ka sorjamin kala sdang bad ka jingïaleit sorjamin lang bad ki heh shipai ka 101 Area ka dang ïaid,” u la ong haba pyntip ba kane ka surok 4-lane kan ïaid naduh ka lad Rilbong haduh ha Barik Point.
Katkum ka jingong jong u, ïa ka Detailed Project Report yn sa pynkhreh hadien ba dep ka jingsorjamin lang bad ki shipai ka 101 Area, PWD, ki bor District bad ka NHIDCL.
