Shillong, Ïaïong 28
Ki nongñiah kali kamai ka thaiñ Pynursla ki la pynpaw ïa ka jingsyier ha kaba ïadei bad ka jingshong syier ka surok na ka jingtwa bad ka jinghap ki maw khamtam ha Lad Kamah, Laitkynsew haneng Pomlum.
Ki nongñiah kali ki la ïathuh ba ki don hapdeng ka jingtieng haba ki ïaid na katei ka surok ïoh kumno kumno hap ki maw bad haba poi ha kitei ki jaka ki hap ban husiar bha ban ñiah ïa ki kali ban ailad kawei hadien kawei .
Ki la ong ruh ba ka jingsyier ka surok ka dei khamtam ha ka por slap bad watla ki don hapdeng ka jingsyier hynrei haba shah ban ïaid ki hap ban leit la ka leit ha ryngkat ka jingartatien namar ka jingbylla.
U Bah Longlang Nongkynrih uba dei na shnong Laitlyngkot Umthli uba pynsangeh ïa ki kali ba hiar sha ki thaiñ Pynursla na Laitlyngkot u la ïathuh ba mynta ka sngi dang step la pyllait ïa ki kali ban ïaid hynrei ha ka shiteng sngi la pynsangeh biang namar ka jingtwa biang ka surok.
Shuh shuh u la ïathuh ba ki kali ban hiar mynta ki don ba leit na Sohbar, Wahrew bad ka shimpor 3 lane 4 kynta naduh Shillong.
Bun ki kali kiba hiar sha thaiñ Pynursla, kynthup ki kali na Assam la pynsangeh noh ha Laitlyngkot.
