Jowai, Ïaïong 28
Ka Joint Action Committee (JAC) jong ki ar seng ka Jaiñtia Hills Truck Owner Association (JHTOA) East Jaiñtia Hills Truck Owners and Transporters Association (EJHTOTA) kala pyllait ïa ki trok jong ka karkhana Star Cement na ka jingïakhih kaba khlem buh por. Haba kren sha ki lad pathai khubor, u Ma Biangshwa Shylla u la pyntip ba ïa kane ka rai la shim hadien ka jingïalang ba la khot pynlong da u Deputy Commissioner jong ka East Jaiñtia Hills District hapdeng ka JAC bad ki ar karkhana ka Star Cement bad Dalmia ha ka ophis u DC ha ka 27 tarik Ïaïong.
Ha ka jingïalang, ka karkhana Star Cement kala mynjur ban ai bhah kit mar, mar 9 tylli ki trok ha ka shisngi ïa ki ar seng bad kular ruh ban ym pyndik shuh haba ïadei bad bhah kit ïa ki trok jong ki ar seng, la ong u Ma Shylla.
Haba ïadei bad ka Dalmia, u la pyntip haduh mynta kam pat ai kano-kano ka jubab bad ka jingïakhih kan dang bteng na ka bynta ki trok jong ka Dalmia.
