Khliehriat, Ïaïong 28
Ka Hynñiewtrep National Youth Front (HNYF) East Jaiñtia Zone ka la pynpaw ïa ka jingpyrshah jur halor ka Public Hearing ne ka bishar paidbah jong ka Shree Cement Limited.
Ïa kane ka jingpyrshah na ka liang jong ka HNYF hapoh ka jingïalam u President Ma S Ryngkhlem bad General Secretary Jesper Swer ha ka 28 tarik Ïaïong kila buh da ka shithi ha ophis u Deputy Commissioner East Jaiñtia Hills District.
Kane ka Public Hearing kaba la buh ban pynlong ha ka 22 tarik Jymmang ka thmu ban khlong ïa u mawshun na kawei ka par kaba tip Lum Shyrman kaba hap hapoh Elaka Nongkhlieh, East Jaiñtia Hills District.
Katkum ka shithi ka HNYF East Jaiñtia Zone ka la pynpaw ba kane ka jingpyrshah jong ka, ka long ruh kum ka jingai jingkyrshan ïa ki trai jaka jong ka shnong Shnongrim kiba ïeng pyrshah ïa ka Public Hearing.
“Lada ailad ban khlong ïa u mawshun na katei ka jaka ha Lum Shyrman ka lah ban ktah ïa ka wah Liteiñ kaba don hajan bad ki dohum kiba don hapoh kane ka wah,” la ong ka shithi bad dawa ruh na u Deputy Commissioner bad Meghalaya State Pollution Control Board ban pynsangeh noh mardor ïa kane ka Public Hearing.
