Nongstoiñ, Ïaïong 28
Bun phew tylli ki dukan jong ki bar jylla hapoh ka ïew Shallang ki la khang khyrdep ha ka sngi Ba-ar ha shuwa ba u Chief Executive Member (CEM) ka Khasi Hills Autonomous District Council (KHADC) ryngkat ki MDC kin poi sha ïew Shallang ban pynlong ka jingjurip bad khynra hi da lade ïa ka jinglong jingman jong ki dukan bar jylla ha kane ka ïew.
Ka jingkhang jong ki bar jylla mar mar ïa la ki dukan ha kane ka sngi, katkum ka jingpeit ka dei namar ka jingtieng ka jong ki namar ka jingbym biang ïa ki kot ki sla.
Ha kane ka sngi tang ha ki katto katne kynta ïa kaba u CEM ka KHADC ha ryngkat ki MDC, ki pulit Enforcement ki la pynlong ïa ka jingkhynra ïa ki laisen khaïi (trading licence) ïa ki dukan bar jylla kiba don hapoh ka ïew Shallang, da ki phew tylli ki dukan bar jylla ki la shah tah da ki notis bad shah khang noh namar ka jingbym biang ïa ki kot ki sla kumjuh na ka jingkhang ka jong ki ha katei ka sngi.
U CEM Bah Winstontony Lyngdoh ha ka jingdonlang ruh ki MDC haba kren sha ki lad pathai khubor halor kane ka jingwan hiar ka jong u sha Shallang, u la ong, kaba pynlong ïa u bad ki MDC ban wan sha Shallang ka long hadien ba ki la ïoh ïa ki jingujor na kiba bun balang bad ki kwah ban wan peit hi da la ki jong ki khmat ïa ka jinglong jingman ha ka ïew Shallang.
Shuh shuh u la ong ruh ba ha kane ka jingwan la lap bun ki jingdkoh bad kine ki dei na ki snem bala leit, bad la bun bun tylli ki snem lehse kam pat ju don kumne ka jingwan ban khynra ïa ka trading license lane ban jurip hi da lade na ka liang ki MDC, ki Enforcement.
“Ngi lap da la ki jong ki khmat ïa ki jingdkoh ka jingtrei kam ha kaba ïadei bad ka jingai ïa ki trading license kiba naduh mynshuwa, ha kaba ki don ki laisen ki bym pynthymmai (renew) naduh ki snem 2003-2004, kine ki dei ka jinglap haba ngi wan jurip ha kane ka sngi,” la ong u CEM.
U CEM u la bynrap ruh da kaba ong, “Ngi la ïoh ruh ban ïakren ïa ki trai dukan kaba ngi ïakynduh bad ki la batai ïa ki jingeh kaba ki don bad na ka liang jong ka ophis ruh kala kloi ban ïadon ryngkat bad ki ban ïa phylliew jingmut bad ki kaei ka jingeh.”
U la ïathuh ruh ba kawei ka jingeh kaba la lap ha ka jingjurip ha kane ka sngi ka dei ba ki NOC kaba ki ai ki sordar shnong mynshuwa hangne ka long beit tang marwei marwei bad kata ka dei ka jingeh kaba ki nongshong shnong ki buh bad kaba ar ka long ba kim lah ban wan pynthymmai (renew) ka long na ka jingjngai jong ka jaka hynrei kin nym lah ban ai daw kumta.
“Kaei kaba ngi kyntu ïa ki trai khamtam ïa kito ki ban leh ïa ka jingpynthymmai (renew) ba kin wan mih dalade, kin wan pynbiang ïa ki kot ki sla naduh ki NOC bad kiwei kiwei ki jingdonkam. Ngin sa ïa peit lada ki la wan sha KHADC kiei ki kot kiba ki wanrah bad lada ki dei kiba biang, ngin ïaid shakhmat bad lada kim biang ki kot ki sla na ka liang ka KHADC ngin shim ïa ka sienjam kiba tyngeh ba ngin nym ailad shuh ïa ki, ba kin leh ïa ka jingpynthymmai (renewal),” u la ong.
Shuh shuh u la ïathuh ruh ba kumba 60 haduh 70 tylli la dep ban tah ïa ki notis bad kumba 7 haduh 8 tylli la khang syndon ïa ki dukan ha kaba ki trai ki hap ban wan mih sha KHADC bad katkum ka jingtip hapoh Shallang ki don kumba 200 tylli ki dukan bar jylla kumta yn pyrshang ban pyndep ha kane ka sngi.
U CEM u ïathuh ruh ba ha ki notis ïa kaba la tah la ai por ïa ki haduh 7 sngi ba kin wan mih sha KHADC ha ryngkat ki kot ki sla kiba biang bad lada kim wan hapoh 7 sngi, yn ai da ka jingbthah sha ki sordar shnong ba kin pynthylli noh ïa kito ki dukan bad ailad ïa ki trai jaka ba kin pyndonkam ïa kito ki dukan.
Ha kane ka jinghiar khynra u CEM ha Shallang, la synran lang ruh da u Bah Powell Sohklet, MDC Mawthadraishan, Dr. Juristman Iawphniaw MDC Nongstoiñ, Bah Seibor Warbah MDC na Mawkynrew, Bah Kitdor Syiem MDC Nongkrem, Bah Bill Clinton Wankhar MDC Sohryngkham bad la don lang ruh ki nongïalam ka VPP Sengkmie Youth Wing, ki dkhot ka VPP na West bad East Khasi Hills, ki dkhot ka HYC bad kiwei kiwei.
