Shillong, Ïaïong 28
Ka kynhun jong ki pulit na ka thanad Jengjal ka la pynlong ïa ka jingkhynra ha ka 27 tarik mynta u bnai bad ban kem noh ïa uwei u briew uba la donkti ban thok ïa ki paidbah da kaba leh mynleh kum u nongtrei jong ka MePDCL.
Une u briew uba la shah kem noh ha ki pulit u dei uba la tip kyrteng kum u Kissan B Marak, uba dei u nongshong shnong ka Ampati ha South West Garo Hills District.
La ong ba une u briew u la phet rieh bad ïaleh ban lait na ka jingshah kem, la slem bha bad dei tad ha ka sngi Nyngkong ba u la shah kem noh.
Lah ban pyntip hangne ba ïa ka jingujor pyrshah ïa une u briew halor ka jingthok ïa ki paidbah da kaba leh mynleh kum u nongtrei ka MePDCL la register ha thanad Jengjal, West Garo Hills District, halor ka jingjia kaba la pyntip ba ka la jia ha ka 10 tarik Ïaïong, 2026. Katkum ka ejahar, utei u briew u la leit sha ka ïing jong u nongujor ha thaiñ Nengkalgree kaba hap hapoh ka thanad Jengjal bad u la kam ba u dei u nongtrei jong ka MePDCL, bad ha kaba u la lum ruh ïa ka pisa kaba long T.6,750/- kaba dei ka bai thang bording.
Kham hadien, la lap ba um dei satia u briew ba la thung da ka ophis bad ba u la thok ïa utei u nongujor, kaba la lam pat sha ka jingregister ïa ka case bad ka jingshah kem noh jong u.
Ha ka por ba la pynlong ïa ka jingtohkit, ka la paw ba une u briew u la dep ban thok ruh ïa kiwei ki briew da ka leh mynleh kum u nongtrei ka MePDCL bad ban lum pisa na ki.
Shuh shuh, katkum ki rikod kiba don, haduh mynta haduh 6 tylli ki case la dep ban register pyrshah ïa utei u briew ha ki thanad bapher-bapher jong ka West Garo Hills District, nalor kiba bun ki jingujor da ka ktien na ki paidbah.
Kumta halor kane, la pyntip sha baroh ki paidbah lane kito kiba la ngat ha kane ka kam shah thok ba kin wan shakhmat bad ban ujor da ka ejahar lane ka jingthoh ujor ha ki thanad kiba marjan.
La kyrpad ïa ki nongshong shnong ba kin ai ka jingïatreilang bad ai ki jingtip kiba dei bad ki kam thok, lane suba ïa ka ïaid ka ïeng jong uno uno u briew, ne ki kam sniew ha ki thanad, ki Outpost, Beat House ba marjan lane ban pyntip sha ka Police Control Room, Tura lyngba kine ki number +918837423053, +917005530510, +919089199064.
