Shillong, Ïaïong 28
U Symbud Myntri Rangbah ka Jylla ka tnad PWD (Roads), Bah Prestone Tynsong ha ka Sngi Ba-ar u la ong ba ka projek ‘High-Speed Corridor’ ba la tyrwa kan kyntiew shi kat dei ïa ka ïoh ka kot ka Jylla da kaba pynbun ïa ka leit ka wan jong ki kali lyngba ka Jylla, bad ong ba ka long ka “Main Transit State” ha kane ka thaiñ.
Haba ïakren bad ki lad pathai khubor halor ka jinglong-jingman jong ka projek, u Bah Prestone u la ong, “Na ka bynta ka ‘Package’ I bad II, la dep ban khot ‘tender’ bad ha Ri-Bhoi District, ka jaka la kumno-kumno la lah ban pynbeit; ïa ka jingpynbeit laiñ la lah ban pyndep wat na ka bynta ka Ri-lum Khasi bad West Jaiñtia Hills hynrei ngi don katto-katne ki bynta ha East Jaiñtia Hills ha kaba ka jingïakren ka dang ïaid.”
U la ong ruh ba katei ka surokbah kan khate shi kat dei ïa ka por ha ka leit ka wan.
“Haba ngi la kdew shaphang ka ‘Expressway’, phin sa sngewthuh ba ha ka jaka jong 3 kynta, ïa ka jingjngai jong ka jingleit la lah ban pynduna khnang ba ha lade phin sngewthuh katno kynta ngi la kynshew,” u la ong.
Da kaba khot ïa ka kum ka surok jong ka ïoh ka kot ne ka ‘Economic Corridor’, u Bah Prestone u la bynrap, “Kane ka dei ruh ka ‘Economic Corridor’ kaba nga ruh nga sngew ba lada ngi pyndep ïa ka projek, namarba ka Meghalaya ka dei ka Jylla kaba kongsan jong ka leit ka wan, kumta ha kaba kut, ka jingtuid ki kali kan nang kiew bad ki kam khaïi ruh kin nang kiew.”
Halor balei ba ym shym la shna ïa surok kum ka surok hynriew lynti, u la kdew ïa ka jinglong-jingman ka jaka jong ka Jylla.
“Phi donkam ban sngewthuh kawei, ba haba phai sha Meghalaya khamtam, (lait noh ka Assam) ha ka Thaiñ Shatei Lam Mihngi, ka dei ka jaka lum, kam long kaba lah ban leh – mynta ngan ai nuksa ïa phi ïa ka surok Shillong-Dawki, wat ka surok ar lynti ruh ka long kaba eh bha. Phi lah ban ïohi ba ki don ki bynta, lada phi kren shaphang ka surok saw lynti, ka long kaba khim bad kaba eh bha. Kumta ka daw ba hakhmat eh balei ka Sorkar India kam kwah ban leit na ka bynta ka surok hynriew lynti, ka dei namar kane ka jingkhanglad kaba ngi don ha ka Jylla Meghalaya,” u la ong.
U Bah Prestone u la ïathuh ba ka surok saw lynti jong ka surokbah Umïam-Shillong la aiti ha ka National Highway Infrastructure Development Ltd (NHIDCL).
“Ngi la dep aiti ha ka NHIDCL. Ngi la shim ïa ka rai na ka Sorkar Jylla ba ngin leit na ka bynta ka surok saw lynti naduh Lad Umïam lane Lad Umroi haduh Shillong,” u la ong.
