Shillong, Ïaïong 28
Ka United Democratic Party (UDP) ha Maw-kyrwat Konstitwensi kan sa stang hi iar ha kine ki sngi ban wan, hadien ba ki nongkitkam bad nongkyrshan jong ka, ki la rai ban leit pynïasoh noh bad ka National People’s Party (NPP).
U Secretary ka UDP Mawkyrwat Circle u Bah SK Budnah u la pynthikna ba baroh ki nongkitkam bad ki nongkyrshan jong ka UDP kin sa leit ban pynïasoh noh sha ka NPP ha ka 2 tarik u bnai Jymmang, 2026.
U la ïathuh ba ki bym rung sha ka NPP ki long sa tang u Vice President bad u Organising Secretary ki ban sah ha ka UDP.
U la ïathuh ba ïa u Bah Renikton Lyngdoh uba dei u MLA ba mynta jong ka UDP, um don jingtip eiei hynrei kane ka jingïapynbeit ban rung sha ka NPP ka dei ba la pynbeit tang da ki nongkyrshan.
Shuh shuh u la pynpaw ba ka jingrung sha ka NPP ka long ban wanrah shibun ki kam pynroi ha ka Mawkyrwat Konstitwensi.
Shu pynkynmaw ba katkum ka jingsaphriang ha rynsan social media, la pyni ba ka shithi ki nongkyrshan jong u Bah Renik Lyngdoh Tongkhar kin pynïasoh noh bad ka NPP ha ka 2 tarik u Jymmang, 2026 ha kaba ïa ka jingïalang yn pynlong ha Nativity Auditorium Mawkyrwat.
Ka jingwan ban pynïasoh jong ki nongkyrshan jong u Bah Renik sha ka NPP ki dei ki dak ki shin ba u MLA ka Mawkyrwat un sa pynïasoh noh bad ka NPP.
Lada un wan ban pynïasoh biang sha ka NPP kan long kum ka jingwan phai biang sha la ka jong ka ïing ka sem kaba mynshuwa ba u la don.
Ha u snem 2013 u Bah Renik Lyngdoh Tongkhar u la mih ban ïakhun ïa ka ilekshon na ka NPP hynrei u la rem noh ha u Bah Rowel Lyngdoh. Ha ka ilekshon 2018 u Bah Renik u la mih ban ïakhun biang ïa ka ilekshon MLA na ka HSPDP bad ïoh rah ïa ka jingjop da kaba pynliem ïa u Bah Carnes Sohshang tang da 458 vote. Nangta ha u snem 2023 u Bah Renik u la ïakhun noh na ka UDP bad jop da kaba pynliem biang ïa u Bah Carnes Sohshang.
