Nongpoh, Ïaïong 29
Ki pulit ka Ri Bhoi hynnin ka miet ki la sdang biang ban pynlong ïa ka jingtalasi ïa ki kali pynkheiñ aiñ ba kynthup naduh ki kali heh, kali rit bad ki ar shaka ruh kumjuh, khamtam eh na ka bynta kito kiba ñiah kali hapdeng ka jingshoh khawiang. Kane ka jingsdang biang ki pulit ka Ri Bhoi ka dei shwa tang ka jingai jingtip paidbah bad jingsneng hashwa ba ki pulit kin leh da kaba tyngeh lada dang lap ïa kiba pynkheiñ aiñ nangne shakhmat.
Ha kane ka jingtalasi kali kaba la pynlong ha ka thaiñ Byrnihat jong ka surokbah National Highway 6, la wan ban ïadon bynta lang da u Bah Bankerlang Marwein, DSP ka Ri Bhoi, u Rubul Ali OC ka thanad Byrnihat, u Michael Marak OC ka thanad Nongpoh nalor kiwei de ki pulit ophisar bad la wan ban snohkti lang ruh da ka RBYF Byrnihat Circle.
Lyngba kane ka jingtalasi kali, la lap ba ki dang bun na ki nongñiah kali kiba pynkheiñ ïa ki kyndon aiñ ñiah kali, bad kiba bun na kine ki dei ka jingñiah kali hapdeng ka jingshoh khawiang, ka jingbym deng ïa ki jingda khlieh (helmet) da ki nongñiah arshaka nalor kiwei kiwei de ki jingpynkheiñ ïa ki aiñ.
Haba kren sha ki lad pathai khubor hadien ba la dep ka jingtalasi, u Rubul Ali, OC ka Byrnihat u la ong ba ka jingpynlong ïa ka jingtalasi kali ka dei hadien bun ki jingujor na ki paidbah bad ki jingjia tyngkhuh kali khamtam na ka jingñiah kali buaid, kiba jia khah khah bad wanrah bunsien ïa ki jingjia ba sngewsih bad pyntip ruh ba ha kane ka kynti, ka jingtalasi kan long shwa kum ka jingai jingtip paidbah lane kata ka kynja awareness bad kan long ruh kum ka jingsneng na ka bynta kito ki nongñiah kali ba pynkheiñ aiñ.
U la ong ruh ba kane ka dei tang ka jingsdang bad na ka liang ki pulit kin dang ïai bteng ban pynlong ïa ka jingtalasi ha ki sngi ki ban dang wan, bad ha kata ka por ym nym don jingmap shuh bad lada lap ïa kiba ïaleh pyrshah bad pynkheiñ aiñ, kin ngat beit ha ki kuna kiba tyngeh.
Katba ki nongïalam RBYF kiba la wan lang ha kane ka sngi jong ka jingtalasi ki la pynpaw ïa ka jingsngewkhia jur halor ka jingjia tyngkhuh kali kiba jia khah khah khamtam ha ka surok bah bad pynpaw ruh bunsien ka daw hi ka dei na ka jingñiah kali hapdeng ka jingbuaid bad shoh khawiang.
