Shillong, Ïaïong 29
Ka Hynñiewtrep Integrated Territorial Organization (HITO) ha ka sngi Ba-ar jong ka taïew ka la dawa na ka Yusuf Sharif Shullai, Chairman ka State Environmental Impact Assessment Authority (SEIAA) ban pynsangeh noh ïa ka jingthmu pynlong ïa ka jingïalang pynsngew paidbah ne ka Public Hearing.
Ïa kane ka jingïalang pynsngew paidbah (Public Hearing) la thmu ban pynlong ha ka 22 tarik u Jymmang 2026, ban tih mawshun ha u Lum Shyrman, kaba hap hapoh ka Elaka Nongkhlieh Saipung C&RD Block, EJH.
Haba kren sha ki lad pathai khubor u Bah Donbok Dkhar, President u la ïathuh ba ki paidbah ki la ud la nam sha ka seng ba ka don ka jingshah leh donbor ha ka kompeni M/S Shree Cement Limited.
“Ngi pyrshah ïa ka Public Hearing kaba thmu pynlong ha EJH bad lada ka tnad kam lah ban pynsangeh halor ka jingdawa ka seng, ngin sa shim ka sienjam ban wan shong kyllaiñ mungor ha kane ka ophis jong u Chairman,” la ong u Bah Donbok. U la ong ruh ba ka jingïoh bor kine ki kompeni haduh ban da knieh ïa ka khyndew ka shyiap, dei na ka daw ka Sorkar Jylla. “Lada ka Sorkar, ka MCPCB bad ka SEIAA kin pynlong bad ïaid shakhmat ïa ka Public Hearing, khlem pep kan sa don ka jingïa umsnam para ma ngi,” la bynrap u Bah Donbok.
Namarkata, u la maham tyngeh ïa ka Sorkar Jylla ba lada jia ei-ei, ka dei ban bahkhlieh, namar ka jingleh donbor kane ka M/S Shree Cement Limited khlem da sngap ïa ki nongrep kiba don ha katei ka thaiñ.
