Shillong, Ïaïong 29
Ki Pulit ka Ri-Bhoi District, kila ïoh ban kem ïa haduh 6 ngut ki runar kiba suba donkti ha ka jingkyndang ban tuh pisa na ka kor ATM jong ka Meghalaya Cooperative Apex Bank, kaba la jia ha ka 5 tarik Ïaïong, 2026 ha Bhoirymbong.
Lai ngut na kine ki runar la kem na ka thaiñ Barpeta Assam kiba la tip kyrteng u Jiarul Hoque, Amzad Ali bad u Julhash Uddin. Katba lai ngut pat la ïoh kem na Haryana.
U Superintendent of Police ka Ri-Bhoi Giri Prasad M, u la pyntip ba u la thung ïa ka Special Team ba ïalam da u Addl SP (Crime) ka Ri-Bhoi bad kiwei ki heh pulit ka District, hapoh ka jingbatai kam u DIG (Eastern Range), ban pynlong ïa ka jingtohkit.
Ïa kane ka jingkyndang ATM ha Bhoirymbong la register case ha thanad Umiam C/No. 20(04)2026 hapoh ka kyndon 305(a)/331(4)/324(5)/61 (2)(b)/3(5) BNS.
U SP u la ïathuh ba ki pulit ka Jylla da ka jingïarap ki Pulit ka Assam bad ki Pulit ka Haryana, kila ïoh ban kem ïa ka kynhun ki runar kiba donkti ha ka jingkyndang ïa ki kor ATM ha kylleng ki Jylla ka Ri kynthup ha Meghalaya.
U ïathuh ba kane ka kynhun kala pyndonkam da ki ‘gas cutters’ ban pynpra ïa ka synduk ATM bad kila phet krad bad ka pisa tang da ki minit.
Ka jingtohkit mynta ka dang ïaid shakhmat ban kyndang naduh tynrai ïa ka jingtreikam jong kane ka kynhun.
