Shillong, Ïaïong 29
U Symbud Myntri Rangbah ka Jylla, Bah Prestone Tynsong ha ka Sngi Ba-ar u la ong ba ka Sorkar Jylla ka dang ap ïa ka kaiphod jong ka ‘Delimitation Committee’ kaba la thaw da ka Garo Hills Auto-nomous District Council (GHADC) hashuwa ban shim ïa kano-kano ka rai halor ka ilekshon sha ka District Council.
“La thaw ïa ka ‘Delimitation Committee’ bad mynta ka don hapdeng ka kam ban peit ïa baroh kine ki jingkheiñ kumno ban ai ïa ka kaiphod sha ka District Council bad nangta ka District Council ha kaba kut kan sa mynjur ïa ka hapoh Ïingdorbar bad kan sa phah pat sha u Lat ban ïoh ïa ka jingmynjur”, la ong u Bah Prestone haba kren sha ki nongthoh khubor.
“Kumta, mynta hi na ka liang ka Sorkar Jylla ne na u Lat, ngi dang ap ïa kata, bad ynda la mynjur ïa kata bad phah sha u Lat, nga tikna ba ngin sa lah ban mynjur ïa ka”, u la bynrap.
Haba kylli halor ka por, u Bah Prestone u la ong: “Katkum ka jingpynbna, nga tharai ba ka District Council hi da lade ka la dep pyntip bad kane ka komiti kan pyndep ïa ka kam kumba la bthah (sha ki) hapoh 3 bnai.”
Kane ka jingpynbeit pud kan pruid dak biang ïa ki pud ki sam jong ki konstitwensi kiba hap hapoh ka GHADC.
Katkum ka jingong jong u, ïa ka kaiphod ba khatduh dei ban pdiang da ka Council bad mynjur da u Lat hashuwa ban ïaid shakhmat bad ka kam ilekshon.
