Shillong, Ïaïong 29
Ka jingpynpoi ïa ki umphniang kum ka Petrol, Diesel bad Gas LPG ha Meghalaya ka ïaid beit ïaid ryntih bad kam don kano-kano ka jingkyrduh haba ïadei ka jingsaplai.
Ïa kane la ïathuh da ka Sashwati Mudoi kaba long ka State Level Coordinator, Oil Marketing Companies (OMC) Meghalaya ha ka jingkren sha ki nongthoh khubor ha ka sngi Balang kaba la ïadon lang u Amarjyoti Bordoloi u Chief General Manager, IndianOil AOD State Office, kumjuh u Shai Kupur War, OSD, ka tnad Food Civil Supplies jong ka Sorkar Jylla Meghalaya.
Ka Sashwati ka la pynshai halor ka jinglong jingman ka rukom pynpoi ïa ki tyndong lyer shet (LPG Cylinder) bad kiwei ki kynja umphniang kum ka Petrol, ka Diesel ba baroh ka long kaba biang pura bha ha baroh kawei ka Jylla Meghalaya bad pyntikna ba ka jingbuh ïa ka tyndong lyer shet, kumjuh kiwei ki kynja umphniang ka long kaba biang.
Katkum ka jingïathuh ka Sashwati, haduh mynta ki don 334 tylli ki Petrol Pump (Retail Outlets) ha ka Jylla Meghalaya. Na kine, ka IndianOil ka don 205 tylli, ka Bharat Petroleum ka don 43 tylli, ka Hindustan Petroleum ka don 72 tylli bad 14 tylli jong ki riewshimet (Private) kiba kynthup ïa ka Essar (Nayara), Shell bad Reliance.
“Baroh ki Petrol Pump ki treikam pura bad ym don kano-kano ka jingkhang ne jingpyrkhing ban die. Ka jingpyndonkam ka long kumba ka ju long ha u bnai Kyllalyngkot haduh Lber 2026, kaba pyni ba ka jingdonkam ka long kaba ïaid beit ïaid ryntih, kumta ki paidbah kim dei ban kulmar jingmut,” ong ka Sashwati.
Haba ïadei ka jingsaplai ïa ki tyndong lyer shet, ka la ïathuh ba ki la lah ban pynbiang haduh kumba 3.7 lak ngut ki nongpyndonkam Gas lyngba 66 tylli ki dukan die Gas ha ka Jylla baroh kawei bad mynta ki dukan die Gas ki biang ka ‘Stock’ ba la buh lypa bad kam don kano-kano ka jingkyrduh Gas.
Ka Sashwati ka kyntu ïa ki nongpyndonkam ïa ki tyndong lyer shet ba ki dei ban ‘Book Online’ bad ban pyni ïa u ‘Delivery Authentication Code’ (DAC) ha ka por ba wan pynpoi Gas khnang ban lah ban pynthikna ïa ka jingpynpoi Gas.
Haba ïadei ka jingpynpoi tyndong lyer shet sha ki longïing kiba ïoh jingïarap na ka skhim Pradhan Mantri Ujjwala Yojana (PMUY) ha Meghalaya, ka Sashwati ka la ïathuh ba ka jingpynpoi ïa ki tyndong lyer shet ka long kumba 1,942 tylli ha ka shi sngi.
Ki heh Ophisar Sorkar ki pyntip ruh ba ka jingai tyndong lyer shet na ka bynta ki kam khaïi (Commercial) ka dang long haduh 70% katkum ki kyndon jong ka Sorkar India, ha kaba la buh ha khmat eh ïa ki bynta ba kongsan kum ki Hospital, ki jaka pule, ki jaka ïada ri, ki lynti rel, ki ophis Sorkar, ki Hotel, ki jaka bam, bad kiwei kiwei.
