Shillong, Ïaïong 29
U Myntri ka tnad ka koit ka khiah ka Jylla, u Bah Wailadmiki Shylla ha ka Sngi Balang u la ong ba ka Sorkar ka la thung ïa ka kynhun ban khmih bniah ïa ki jingeh ba la pynpaw da ki nongtrei ka 108 Emergency Services kiba dawa ban shimti noh ka Sorkar, ha kaba ïa ka rai yn sa shim hadien ba u Mission Director ka NHM u wanphai na ki kam ilekshon hadien ka 5 tarik u Jymmang.
U Bah Wailad u la ïathuh sha ki nongthoh khubor ba ka kynhun ki nongtrei 108 ka la ïakynduh ïa u halor kane ka mat.
Katkum ka jingong jong u, baroh arliang mamla ki don la ki jong ki jingeh.
“Namar peit mynta ki nongtrei ka 108 ki don la ki jong ki jingsngewkhia bad phi tip ruh ba ka Sorkar ka don la u pud,” u la ong.
U la bynrap ruh ba la bthah ïa ka kynhun ban khmih bniah ïa kane ka jingeh.
“Dei na kata ka daw ba ngi la thung ïa kawei ka kynhun ban leh ïa ka jingwad bniah halor kumno ngin lah ban kdup ïa ki, kumno ngin lah ban peit ïa ki jingsngewkhia jong ki bad kumjuh ruh ka Sorkar kan ym donkam ban ai shibun kiei-kiei,” ong u Myntri.
“Nga la dep ban ïasam ïa kine kiei-kiei baroh bad ki bad ngi dang ap ïa kata ka kaiphod,” u la bynrap.
U Bah Wailad u la ong ba ïa kane ka kam yn sa pynsted ynda la wanphai u MD ka National Health Mission (NHM).
“Watla katta ruh, nga la ai ktien ba ïa mynta hi, u MD ka NHM u don ha ka kam ilekshon ha South India bad un sa wan biang hadien ka 5 tarik u Jymmang. Ynda u la wan, ngin sa shong bad pyrshang ban pynsted ïa kane ka kam,” u la ong.
