Shillong, Ïaïong 29
Ka Khun Hynñiewtrep National Awakening Movement (KHNAM) ka la pynpaw ba ka don ka jingthung kam sop-sop hapoh ka tnad Secretariat Administrative Department, Nazarat (SADN) ïa kaba la lap lyngba ka Right to Information (RTI).
Ïa kane ka KHNAM ka la pynshai hadien ba ka kynhun Meghalaya Secretariat Progressive Employees Union (MSP-EU) ka la kyntait ïa ka jingkynnoh ba don ka jingthung kam sop-sop hapoh jong katei ka tnad.
Haba kren sha ki nongthoh khubor ha ka sngi Balang, u Bah Thomas Passah Working President ka KHNAM u la pynshai ba dang shen ka seng ka la ïakynduh ïa u Chief Secretary ka Jylla u Dr. Shakil P. Ahammed, IAS ban kdew ïa ka jinglap jong ka seng lyngba ka RTI ba ka don ka jingthung kam ‘Daily Wages’ ha ka tnad SADN.
U Bah Thomas u la pynshai ba ki don arjait ki rukom thep kam ha SADN kaba long lyngba u Najir ka SAD bad lyngba ka ‘Telephone’ ban khot trei khlem da don ka jingpynbna laitkam (Advertisment) bad bynrap ba ïa kine ki nongtrei ba la pynrung kam la wengkam ruh katba mon.
U la pynpaw ba ka long kaba sngewsih ba ki don katto katne ngut kiba la trei la slem bha hynrei ki shah weng kam noh namar ka jingbym ïadei jingmut ne bym ïa sngewtynnad uwei u ar. U la pynpaw ka jingsngewkhia ba ki don ki kam ba sah thylli ha katei ka tnad bad haba ka pynmih ïa ka jingpynbna laitkam, katba haba thungkam ïa ki briew pat la thep ha ka kam kontrak.
U la ban jur ba ka KHNAM lyngba ka RTI ka la lap ba ki don ki briew ba la thung ha kane ka tnad, ki dei ki bahaïing jong ki katto katne ngut kiba trei ha ka tnad SADN, hynrei ïa ki kyrteng ym pat shym la kwah ban pynpaw mynta namar ba ka seng ka la dep ban kyntu ïa u Chief Secretary ban pynbeit ïa kane ka jingbakla.
Ka KHNAM ka la kyntu ïa ki tnad bapher-bapher ba ka jingpynrung kam ka dei ban long kaba shai khnang ba kan ym don kano-kano ka jingweng kam katba mon.
