Jowai, Ïaïong 29
Ki Pulit Traffic Branch ka West Jaiñtia Hills District ki la daiñ kuna T.13,000 bad ïoh ban kurup noh haduh 12 tylli ki ‘modified silencer’ ha ki jingkhynra ba kyrpang ha kine ki saw sngi pyrshah ïa kiba pynkheiñ ïa ki aiñ ñiah kali ha ki bynta bapher-bapher ka sor Jowai.
Ïa kane ka jingkhynra la ïalam da u Sub-Inspector H. Sayoo, 2nd In-Charge ka Jowai Traffic Branch kaba thmu pyrshah ïa ki nongñiah kali kiba pynkheiñ aiñ bad ki kali kiba pyndait beaiñ da ki modified silencer, kiba tah ïit ïong bad kiba ñiah arshaka khlem helmet.
Ha kane ka jingkhynra ki pulit ki la tar bad weng noh ruh ïa kiba tah ïit ïong na ki 39 tylli ki kali.
Ïa ka jingkhynra kaba nyngkong la pynlong ha ka 22 tarik Ïaïong ha Lad College, Moorolong ha kaba la ïoh ban kurup noh ïa lai tylli ki ‘modified silencer’ bad la weng noh ïa ki ïit ïong na ki 10 tylli ki kali bad daiñ kuna T.2,500.
Ha ka 24 tarik Ïaïong la pynlong biang ïa ka jingkhynra ha ka jaka kaba mar pyrshah ka Vishal Mega Mart ha kaba la ïoh ban kurup noh ïa artylli ki ‘modified silencer’, ka jingweng ïa 12 tylli ki ïit ïong bad daiñ kuna T.3000.
Ha Iawmusiang la pynlong ïa ka jingkhynra ha ka 26 tarik Ïaïong ha kaba la ïoh ban kurup noh ïa saw tylli ki ‘modified silencer’, jingweng ïa ki ïit ïong na ki phra tylli ki kali bad daiñ kuna T.3,500.
Ïa ka jingkhynra kaba khatduh la pynlong ha ka 28 tarik Ïaïong ha Lad Stadium, Ladthadlaboh, ha kaba la kurup noh lai tylli ki ‘modified silencer’, ka jingweng ïa khyndai tylli ki kali tah ïit ïong bad daiñ kuna T.4000.
Ki pulit ki pyntip ruh ba kin dang ïai bteng ban pynlong ïa kiba kum kine ki jingkhynra na ka bynta ka jingshngaiñ ha ki surok bad ban pynthikna ban bud ryntih ïa ki kyndon aiñ ñiah kali.
