Shillong, Ïaïong 29
U Himanta Biswa Sarma u lah ban bteng biang sa shisien ban long kum u Myntri Rangbah ka Jylla Assam hadien ba ki khubor jong ka ri India kiba la ïathuh lypa ne exit polls ba ka kynhun NDA ba la ïalam da ka BJP kan wan biang ha ka bor ban synshar ïa ka Jylla Assam hynrei ïa kane yn sa lah ban pynthikna biang tad ynda la ñiew ïa ki vote ha ka 4 tarik Jymmang 2026.
Katkum ka jingbatai ka News18 la ong ba ka NDA kaba kynthup ïa ka BJP, Asom Gana Parishad (AGP) and Bodoland People’s Front (BPF) kin ïoh 90 haduh 100 ngut ki MLA na ka 126 ngut ka jingdon ki MLA ha ïingdorbar thawaiñ ka Jylla Assam, katba ka Congress kan ïoh 23 haduh 33 ngut ki MLA bad ka AIUDIF kan ïoh kumba 6 ngut.
Katba ka Axis My India ka kynhun synrop NDA kan ïoh 88 haduh 100 ngut, katba ka JVC ka ïathuh ba ka NDA kan ïoh 88 haduh 101 ngut. P-MARQ ka ïathuh ban ïoh 82 haduh 94 ngut. ka People’s Pulse ka batai ban ïoh 68 haduh 72 ngut, ka Matrize ka ïathuh ban ïoh 85 haduh 95 ngut.
Ka kynhun synrop ba la ïalam da ka Congress, ka Axis My India ka la batai ba kan ïoh 24 haduh 36 ngut, ka JVC ka batai ban ïoh 23 haduh 33 ngut bad ka P-MARQ ka batai ban ïoh 30 haduh 40 ngut. Ka People’s Pulse ka ïathuh ba kan ïoh 22 haduh 26 ngut, katba ka Matrize ka ïathuh ba kan ïoh 25 haduh 32 ngut.
Shuh shuh ka Axis My India’s ka batai ba tang ka BJP marwei kan ïoh 70 haduh 80 ngut, ka Asom Gana Parishad (AGP) kan ïoh 7 haduh 9 ngut bad ka Bodoland People’s Front (BPF) kan ïoh 9 haduh 11 ngut.
Kumban shu pynkynmaw ki paidbah jong ka Jylla Assam bad Kerala ki la ïoh ban leit thep vote ha ka 9 tarik mynta u bnai Ïaïong, ha Tamil Nadu ki paidbah ki la ïoh thep vote ha ka 23 tarik mynta u bnai, ha West Bengal la phiah ar bynta kata shi bynta la thep ha ka 23 tarik Ïaïong bad ka bynta kaba ar la thep ha ka 29 tarik Ïaïong bad baroh kine ki Jylla ka jingñiew vote kan long ha ka 4 tarik Jymmang, 2026.
Ka jingïathuh lypa ki khubor jong ka ri India ka la sdang ha ka janmiet ka sngi Balang naduh ka por 6:00 baje hadien ba la kut ka jingthep vote ha ka bynta kaba ar ha Jylla West Bengal kaba dei hi ha kane ka sngi.
La ïathuh lypa ruh ba ha Tamil Nadu kaba don 234 ngut ki MLA ha ïingdorbar thawaiñ, ka DMK kan synshar biang namar kan ïoh 120 haduh 140 ngut katba ka ADMK kan ïoh 60 haduh 70 ngut katba ka TVK kan ïoh 30 haduh 40 ngut.
Katba ha West Bengal kaba don 294 ngut ki MLA ha ïingdorbar thawaiñ ki don ki khubor ki ïathuh ba ka BJP bad ka TMC ki ïakhaid bha, don kiba ïathuh ba ka BJP kan ïoh 141 haduh 162 ngut ki MLA katba ka TMC kaba synshar bun snem kan ïoh 119 haduh 137 ngut ki MLA.
Ha Kerala kaba don 140 ngut ki MLA ha ïingdorbar thawaiñ, ka UDF kaba la ïalam da ka Congress kan ïoh 75 haduh 85 ngut ki MLA, katba ka LDF ba la ïalam da ka CPI-M kan ïoh 55 haduh 65 ngut ki MLA katba ka NDA ba la ïalam da ka BJP kan ïoh kumba 3 ngut.
