Shillong, Ïaïong 29
U President ka NPP Mawkyrwat Block Bah Carnes Sohshang u la pynpaw ba kam shym la don kano kano ka jingïakren shaphang u MLA ba mynta u Bah Renikton Lyngdoh Tongkhar hynrei ka jingïakren ban wan rung sha ka NPP ka dei tang ïa ki nongkitkam ka UDP.
U la ïathuh ba ha ka 2 tarik Jymmang ka NPP kan pdiang ym tang ïa ki nongkyrshan ka UDP hynrei kan pdiang ïa ki nongkyrshan ka Congress bad HSPDP.
U la ïathuh ba ki ar ngut ki Symbud Myntri Rangbah ka Jylla kata u Bah Prestone Tynsong uba dei u President ka NPP Meghalaya State Unit bad u Bah Sniawbhalang Dhar kin wan ban pdiang burom ïa ki nongkitkam bad ki nongkyrshan jong u Bah Renikton haba kin rung sha ka NPP.
“Ngin sa pynthikna ha ka 2 tarik Jymmang katno ngut ki nongkitkam bad nongkyrshan ka UDP kin wan rung sha ka NPP,” la ong u Bah Carnes.
Haba kylli ka don ne em ka jingsheptieng ïoh duh tiket ha u 2028 lada yn wan rung noh u Bah Renikton sha ka NPP, u Bah Carnes u la ong ba ïa kata ym pat ïakren namar ka ilekshon ka dang jngai hynrei ïa mynta kum u President ka NPP Mawkyrwat Block u pdiang beit lada wan mano mano na kiwei ki seng ban pynkhlaiñ ïa ka NPP.
Watla ki nongkitkam ka UDP bad ki nongkitkam ka NPP na Mawkyrwat ki ai daw ba kim don jingtip shaphang u Bah Renikton hynrei ki khubor ki ïathuh ba ka jingïakren u Bah Renikton bad ki nongïalam ba hakhmat ka NPP ka la ïaid ba ïa mynta kin dang phah tang ïa ki nongkyrshan bad ynda la jan dei ka por u Bah Renikton un sa mih noh na ka UDP bad rung sha ka NPP ban ïakhun ïa ka ilekshon MLA ha u 2028 na ka NPP.
