Shillong, Ïaïong 29
Ka ïingbishar Meghalaya High Court ha ka sngi Ba-ar, kala ther ïa ka Sorkar Jylla halor ka jingbym biang ki jingai jingkheiñ halor ka kam khaïi ïa ki minor mineral, haba pynpaw ba kane ka pyni ba ka don ka jingpyrshang ban ïalam bakla ïa ka ïingbishar ha ka mukotduma public interest litigation (PIL).
Ka Division Bench jong ka Chief Justice Revati Mohite Dere bad Justice HS Thangkhiew, kala thung ruh ïa u Advocate Philemon Nongbri kum u amicus curiae bad hukum ïa u Commissioner of Transport bad Secretary ka tnad Forest ba kin wan mih hi dalade ha ïingbishar ha ka sien shong bishar ban wan.
Haba bishar ïa ka PIL bala mudui da u Registrar General ka High Court, ka ïingbishar kala bishar ïa ka status report bala aiti da u Advocate General A Kumar na ka bynta ka Sorkar.
Ka kaiphod bala soi da u Commissioner of Transport, ka kam ha ka paragraph 10 “Ka long kaba donkam ban kdew ba hapdeng u bnai Ïaïong 2025 haduh Rymphang 2026, haduh 2,030 tylli ki kali kila kit ïa 25,903 MT ki minor mineral, kaba pyni ba ym duna ïa ka 7 tylli ki kali ki ïaid ha ka shisngi ban khaïi ïa ki marpoh khyndew ha Jaiñtia Hills Territorial Division”.
Ka ïingbishar ka shem ba kane ka jingkheiñ bala ai, kam ïahap satia bad ki jingkheiñ bala pynpaw ha ki annexure ne kiwei pat ki kot bala pyndait lang.
“Ka jingpyntip jong u Commissioner of Transport ha ka status report ka long pyrshah ïa ka chart bala pyndait lang da u Commissioner ha ka sla 29,” ong ka hukum.
Hadien ba ka ïingbishar kala pynsngew ïa kane ka mat, u Advocate General u la pan por ban ïoh ïa ka jingbthah.
Ka ïingbishar ka sngew “ba don eiei ha lyndet, kaba paw ba ka don ka jingpyrshang ban ïalam bakla ïa ka ïingbishar haba ïadei bad kane ka jingai jingkheiñ bala kdew haneng, ka chart bala pyndait lang kum ka annexure 6 ha ka sla ba 29”.
Ka ïingbishar kala kdew ba ka kaiphod ka pyni ba ki kali kila shah daiñ kuna namar ka jingpynkheiñ ïa ka kyndon 192. 190 (2) bad 179 jong ka Motor Vehicle Act, 1988, hynrei ym shym la pynngat mukotduma satia.
“Ka paw ruh ba ym shym la ujor mukotduma pyrshah ïa kine ki kali, kiba la shem ba ki pynkheiñ aiñ, hapdeng ka 22 tarik Ïaïong 2026 bad 25 tarik Ïaïong 2026,” ong ka ïingbishar.
Ha kajuh ka por, u DSGU Dr N Mozika u la aiti ïa la ka jong ka status report na ka bynta ki BSF kala pynpaw “La pynsngew hangne ba ka kamram jong ki BSF ka long ban ai pahara. Kam don bynta eiei ruh ha ka jingpeit ïa ki kot ki sla ha ka kam khaïi, bad kumjuh ruh ban ai lane talasi ïa ki driving license, PUC certificate, fitness certificate jong ki kali kynthup ka jingkit mar, naba ki BSF kim shym la ïoh bor ban talasi ïa ki kot ki sla da kano kano ka ain”.
