Shillong, Ïaïong 29
Ka jinglong jingman hapoh jong ka North-Eastern Hill University katba nangmih ki sngi ka la nang hiar arsut namar ka jingbymdon u khlieh nongpeit nongpynïaid ïa ki kam ba bun jong ka Skulbah.
Haba kren sha ki nongthoh khubor ha ka sngi Balang u Prof. Lakhon Kma President ka North-Eastern Hill University Teachers’ Association (NEHUTA) u la ong ba ka long ka man ha Skulbah NEHU ka la hiar haduh katta-katta na ka daw jong ka jingbymdon u Vice-Chancellor (VC) kumjuh ka jingtuklar ka jong u ïa ki kam ki jam ha NEHU.
U Prof. Kma u la ïathuh ba ka jingbym wantrei ne ka jingbym don u Vice-Chancellor hapoh ka skulbah NEHU ka la kot sha ka 540 sngi bad kane ka la ktah jur ïa kiba bun ki kam ki jam ha kaba ïadei ban pyntyllun ïa ki kam jong ka skulbah.
U Prof. Kma u la kynnoh ruh, watla u VC u khlem wan trei ne ïuhkjat ha ka Skulbah mynta la kumba shisnem shiteng tam hynrei une u VC u tuklar ïa ki kam kiba man ka sngi jong ka Skulbah kaba ktah ïa ka rukom trei kam jong ka.
U la pynpaw ïa ka jingeh haba ïadei ka kam pisa-pilaiñ, ka jingpynslem ban pyllait ïa ki ‘Bill’ bad ka jingbymdon nongïalam ka pyndiaw ïa ki nonghikai bad kiwei kiba don bynta lang na ka bynta ka lawei jong ka Skulbah.
Haba bynrap u Prof. Kma u la ong, ka jingbym ai jingthoh ban pynskhem ïa ki nonghikai kiba la thung ha u snem 2023, ka jingbym ïoh jingtip ïa ki rai ba la shim ha ka Executive Council kaba la pynlong dang shen ka buh jingeh shibun.
Ka NEHUTA ka pynpaw ïa ka jingkyrmen ba u ban shimti ïa ka shuki Vice-Chancellor (VC) hadien ba ka por jong u VC ba mynta kan kut noh ha ka 25 Naitung 2026, un lah ban shimti ban pynïaid beit ïa ki kam bad ban tei thymmai, ban pynbha-pynkhlaiñ ïa kane ka Skulbah ha ki por ban wan.
