Shillong, Ïaïong 30
Ka jingshah tuh jong ki kali arshaka ka la nangjur na kawei ka sngi sha kawei pat nalor kiwei pat ki kam tuh kam thiem kiba dang ïai bteng bad ïa kane lah ban sakhi na ki jingjia shah tuh kiba dang shen na kylleng ki bynta jong ka sor Shillong bad na kiwei ki jaka ruh kumjuh.
Katkum ka khubor na ki pulit la ong u Biki Hinge u la ai ka jingujor ba ha ka step jong ka 25 tarik mynta u bnai ha ka por kumba 3 baje eiei, ki runar bym lah ban ithuh ki la tuh ïa ka arshaka jong u kaba don ïa u registration number ML04-D-9083 na ka thaiñ Lummawrie, Laitumkhrah, Shillong.
Kumjuh ruh na ka liang jong u Ashok Thapa u la ai ka jingujor ba ha ka 24 tarik mynta u bnai ha ka por kumba 7 baje janmiet, ki runar bym lah ban ithuh ki la tuh ïa ka arshaka ka jong u, kaba don ïa u registration number ML05-Z-5073 na ka thaiñ Upper Mawprem, Shillong.
Ha ka 26 tarik mynta u bnai, ha ka por kumba 11.15 mynmiet, u Neville Sohtun u la pyntip sha ki pulit ba ki runar bym lah ban ithuh, ki la tuh ïa ka arshaka ka jong u, kaba don ïa u registration number ML05-AF-5130 na ka thaiñ Windermere, Nongrah, Shillong.
Ha kawei pat ka khubor, ha ka 25 tarik mynta u bnai ha ka por kumba 6.40 janmiet, u Rajesh Rampal u la pyntip sha ki pulit ba ki runar bym lah ban ithuh, ki la tuh ïa ki waiar ilektrik, ki switch box, bad kiwei ki tiar kiba shongdor haduh kumba T.1.5 lak na ka jaka pyntrei kaba don ha Kench’s Trace, Shillong.
Kumjuh ruh na ka liang jong u Justrin N Marak u la ai ka jingujor sha ki pulit ba ha ka 24 tarik mynta u bnai, ki runar bym lah ban ithuh, ki la tuh ïa ki ar tylli ki ‘rubber roller machine’ kiba pyntreikam da ka kti, nalor kiwei ki tiar kiba shongdor haduh kumba T.1.29 lak na ka kper rep ‘rubber’ kaba don ha Rongkhugre, Shallang ha West Khasi Hills.
