Jowai, Ïaïong 30
Ka Seng Samla Shnong Umkiang (SSSU) kala pynpaw ka jingbitar halor ka jingthut palat ka Network Jio kaba la pynjynjar ïa ki paidbah jong ki ar shnong ka Umkiang bad Pyrtakuna.
Ha ka kyrwoh ba la phah da u President Seng Samla Shnong Umkiang u Raplem Pohduna u la ong, tang shu lip ka bording ka Network Jio ruh kala jah syndon ha kitei ki shnong bad kaba la ktah shikatdei eh khamtam ha kaba kum kane ka por ba baroh ki briew ki donkam ïa ka Network kaba biang na ka bynta ban trei ïa ki kam bapher-bapher.
U la ong ba na ka liang ka Seng Samla Shnong Umkiang na ka por sha ka por kala ujor bad kyntu ruh ïa ki nongtrei Jio ban pynbiang ïa ka Network khnang ba kan pynsuk ïa ki paidbah, hynrei ka ophis Jio kala pulom ban leh ïa kane.
Halor kane, u la ong, ka Seng Samla Shnong Umkiang kam banse shuh ban shim da ki sienjam kiba kham tyngeh kata ban khang tala syndon ïa ka ophis Jio ha kano kano ka por lada kam lah ban pynbiang Network ha kitei ki ar shnong.
