Shillong, Ïaïong 30
Ki riew paidbah kiba la kam ba ki dei na Rilum Jaiñtia kiba ju im ban kamai jakpoh na ka kam tih Dewïong ha ki snem ba la dep, ki la mih shakhmat ban kyntu ïa ka Sorkar Jylla ban weng noh ïa ka jingkhang tih bad shalan ïa u Dewïong.
Kum ban shu kdew, ka National Green Tribunal (NGT) ha u snem 2014 ka la khang ban tih bad ban shalan ïa u Dewïong ha ka Jylla Meghalaya.
U Bah Riodame Shadap haba kren sha ki nongthoh khubor ha ka sngi Palei, u la pynpaw ba ki paidbah ka Rilum Jaiñtia ki la ïakynduh jingeh shibun na ka daw ka jingshah khang ïa ka kam tih Dewïong ha ka Jylla, kaba la pynsohsat ïa ki ba bun ki longïing longsem kiba im ban kamai bad ban pyndap pynbiang ïa ki jingdonkam haïing hasem na ka kam tih bad shalan Dewïong.
Shuh-shuh u la kdew ba naduh ba khang ïa ka kam tih Dewïong hapoh ka Jylla ka ïoh ka kot ki paidbah ka thaiñ ka la hiar shaba palat bad ka jingduk ka la ban jur haduh ba don ki longïing longsem ba ki kmie ki kpa ba hap ban pynpep skul noh ïa ki khun.
Nalor kata u la kdew ruh ba ka Sorkar Jylla ruh ka duh noh da ki spah klur namar ka jingpynsangeh ïa ka kam tih dewiong ha ka Jylla, “Katkum ka kaiphod jong u snem 2012-13 ka ïathuh ba ka Sorkar ka ïohnong haduh T.357 klur lyngba u Dewïong,”
Shuh-shuh u la kdew ba ha u snem 2015 ka Jylla ka pynmih haduh Hynriewphew lak ton u Dewïong bad lada ka Sorkar ka shim tang kumba saw phew hajar tyngka na kawei ka trok bad ha lak tylli ki trok, ka Sorkar ka la ïoh ban lum kumba 500 klur tyngka ka pisa ha ka shisnem bad kane ka la kyntiew ïa ka pla tyngka jong ka Sorkar.
Kumta na ka liang ki paidbah ka thaiñ ki kyrpad ïa ka Sorkar ba kan plie ïa ka kam tih Dewïong hapoh jong ka Jylla khnang ba ki paidbah kin lait noh na kine ki jingeh ba ki la ïakynduh mynta la kumba 12 snem tam eiei.
