Shillong, Ïaïong 30
Ïa ka metïap jong kawei ka samla kynthei kaba na Uttar Pradesh kaba la hap ha wah Daiñthlen, Weisawdong la lap noh ha ka step jong ka 30 tarik u Ïaïong 2026.
Ïa ka met jong katei ka samla la lap nyngkong da ki paidbah kiba la ïa trei shitom ban ïa wad naduh ka sngi ba ka hap shapoh um, ha ryngkat ka jingdon lang ki pulit ka Search and Rescue Team (SRT) bad kiwei kiwei de.
Haba ïoh ban ïakren bad u nongshong shnong ka Weisawdong uba la don bynta ban wad ïa katei ka samla u la ïathuh, ba katei ka samla na UP, ba dang 15 snem ka rta, ka la hap hynnin ka sngi Balang, ka 29 tarik u Ïaïong 2026, ha ka por 11 baje ei-ei mynstep, katba ka dang ïa shondur, hynrei namar ka jingheh palat ka um kim shym la lap ne ïohi.
U la ïathuh ba dei ha ka step jong ka sngi Palei, ka 30 tarik u Ïaïong 2026, ha ka por 8 duna eiei, la lap noh ïa katei ka samla kaba don hapoh ka tyngkhap maw ha katei ka wah.
Katei ka khynnah ka wan bad ki bahaïing na Uttar Pradesh ban wankai bad peit ïa ka jingitynnad ka thaiñ Sohra.
U la ïathuh ba hadien ba la lap ïa katei ka metïap ki nongshong shong ki la pyntip noh mar-mar sha ki pulit, kiba la wan ban sei ïa ka na katei ka tyngkhap krem bad kaba jngai tang kumba katto-katne metre na ka jaka ba ka hap.
Ïa ka met jong katei ka samla la rah noh sha Sohra CHC bad ban pyndep ruh ïa ka post mortem.
U nongshong shnong ka Weisawdong u la ïathuh ruh ba kam shym long kaba jynjar ban ïa wad, namar ba ha ka step kaba bud, ki la leit biang ha kajuh ka jaka ba ka hap bad la lap noh pat harum na ka jaka ba ka hap.
