Shillong, Ïaïong 30
Ha ka jingjia shah tep im iwei i khyllung kaba la jia ha kawei ka Shnong kaba hap ha Ri Bhoi District, la ïoh jingtip ba itei i khyllung mynta i la nang kham ïoh bor, bad ïa kane la pyntip da u Secretary ka Shnong.
Haba ïoh ban ïakren bad u Secretary Shnong, u ïathuh ba hynnin ka sngi, u la ïoh ban ïakren bad kawei na ki bahaïing jong itei i khyllung kiba ap ha Hospital, ha kaba ki la ïathuh ba i khyllung i la kham ïoh bor bad ka kmie ruh ka dang don hapdeng ka jingshah sumar.
La ïathuh ba ïa itei i khyllung la kha ha kawei ka jaka kaba marjan bad kawei ka skul, ha ka por mynstep kumba 6 baje eiei jong ka 28 tarik u Ïaïong, 2026, bad la tep ruh ha katei ka jaka hi da ka kmie jong itei ki khyllung.
Ka dei ha ka por kumba 12:30 eiei mynsngi, ba ki khynnah pule jong katei ka skul ki la ïohsngew ïa ka sur ba ïam jong i khyllung kaba dei ruh ka por ba wai bamja shiteng sngi, bad kumta ki la pyntip mar-mar sha ki nonghikai bad ki nonghikai ki la phah sei ïa itei i khyllung na ka khyndew ba la tep ïa i.
Ïa itei i khyllung la tep hapoh ka khyndew naduh ka por 6 baje mynstep haduh ban da lap ïa i ha ka por 12 shiteng ha ka por shiteng sngi, kaba la jan kot sha ka 7 kynta ei-ei.
