Shillong, Ïaïong 30
Ka jingai jingkheiñ dalade na ka bynta ka khana samari 2027 kan sdang ha kylleng ka Jylla Meghalaya naduh ka 1 tarik u Jymmang, 2026, kaba long u mawmer ba kongsan ha ka khana samari kaba nyngkong eh ha ka ri India kaba pyndonkam da ka lad digital.
Ïa kane la pynbna ha ka jingïalang bad ki lad pathai khubor ba la pynlong da ka Press Information Bureau (PIB), Shillong ha ryngkat ka jingïatreilang bad ka Directorate of Census Operations, Meghalaya, kaba la long ha ka sngi Palei ha Shillong Press Club.
Haba ai jngkren sha ki lad pathai khubor, u Director ka tnad Census Operations, Meghalaya, Sorkar India u Biswajit Pegu u la ong ba ka Khana Samari 2027 kan long ka kam kaba kongsan, ha kaba ka dei ka Khana Samari kaba 16 bad kaba 8 naduh ba la ïoh ïa ka jinglaitluid. U la ban jur ba ha ka sien kaba nyngkong, ïa ka kam ba ïadei bad ka khana samari baroh kawei- naduh ka jingkheiñ briew haduh ka jingbishar bniah ïa ki jingtip – yn pynlong lyngba ka lad digital da kaba pyndonkam ïa ki mobile application bad ka rynsan Census Management and Monitoring System (CMMS).
U Pegu u la pyntip ba ki nongshong shnong kin don ka lad ban ai jingkheiñ hi dalade lyngba ka rynsan online naduh ka 1 tarik u Jymmang haduh ka 15 tarik u Jymmang, 2026. Kane ka ailad ïa ki briew ban pyndap ïa ki jingtip ba bniah shaphang ka longïing jong ki, ïa kaba hadien yn sa pynshisha da ki nongshim jingkheiñ ha ka por ba ki leit sha man la ki tyngkong ïing. U la ban jur ba kane ka sienjam kan kyntiew ïa ka jinglong kaba shai, kaba thikna, bad ka jingïashim bynta jong ki paidbah ha ka kam ba ïadei bad ka khana samari.
Kiwei pat ki heh ophisar kiba la don lang ha kane ka jingïalang bad ki lad pathai khubor ki kynthup ïa u Subhasish Chatterjee, Joint Director; u B Basumatary, Deputy Director; Bah Aibor Sanglyne, Deputy Director na ka tnad Census Operations. Ïa ka jingïalang bad ki lad pathai khubor la pynïaid da u Assistant Director ka PIB Shillong u Gopajit Das.
Ïa ka khana samari 2027 yn pynlong ha ki ar bynta. Ka bynta ba nyngkong ka kynthup ïa ka jingai jingtip dalade bad ka House Listing Operations (HLO). Hadien ka samoi ai jingtip dalade, yn pynlong ïa ka HLO naduh ka 16 tarik u Jymmang haduh ka 14 tarik u Jylliew, 2026, ha kaba ki nongshim jingtip kin lum ïa ki jingtip shaphang ki jinglong jingman jong ka ïing, ki jingdon jingem, bad ki jingdonkam ba kongsan lyngba ka jingkylli ba la buh ryntih kaba kynthup ïa 33 tylli ki jingkylli. Ka bynta kaba II, ka jingkheiñ ïa ki nongshong shnong, kan long ha u bnai Rymphang 2027, bad ka tarik ba la buh ha ka 1 tarik u Lber, 2027.
Haba kren shaphang ka bynta kaba ïadei bad ka aiñ, u Pegu u la ong ba ïa ka khana samari la pynlong hapoh ki kyndon jong ka Census Act, 1948 bad Census Rules, 1990. U la ong ba ka jingpynkylla digital kan pynthikna ïa ka jingbeit jong ki jingtip lyngba ki jingkylli ba la buh lypa ha ki mobile application bad ka jingpyntreikam kham kloi, kaba plie lad ïa ka jingpynmih resol ha ka por kaba biang.
Haba batai bniah ïa ka rukom treikam, u la ong ba ïa ka jinglum jingtip yn pynlong lyngba ki mobile apps ba kyrpang ba la pyndonkam da ki nonglum jingtip bad ki nongpeit ha ki smartphone. Ka rynsan CMMS kan pynïaid ïa baroh ki kam kynthup ïa ka jingai jinghikai, ka jingpeit bniah, bad ka jingthaw ïa ki House Listing Block ba la don ka geo-code lyngba ka HLB Creator (HLBC). Ïa ki jingtip ba la ai hi dalade yn pynshisha ha ka por ba leit sha ki ïing shwa ban aiti khatduh.
Halor ka jingïada ïa ki jingtip, u Pegu u la pynthikna ba la pyntreikam ïa ki lad jingïada kiba khlaiñ ban pynneh ïa ka jingïada ïa ki jingtip. Yn nym pynpaw ïa ki jingtip jong ki briew bad jong ki longïing, bad yn pyllait tang ïa ki jingtip ba la lum lang ha ki kyrdan pynïaid kam bapher-bapher na ka bynta ban thaw ïa ki polisi bad ka jingpynkhreh kam na ka bynta ka roi ka par. Ïa ki number mobile ba la lum yn pyndonkam tang na ka bynta ka jingïakren bad ka kam pynshisha.
U la pyntip shuh shuh ba kumba 9,000 ngut ki nonglum jingtip bad ki nongpeit yn buh ha kylleng ka Jylla, ryngkat bad ka rukom peit bniah kaba khlaiñ bha ba bun bynta ban pynthikna ïa ka jinglong thikna jong ki jingtip. Ka Khana samari kan kynthup ïa baroh ki longïing, katba ki katto katne ki thup kum ki bar jylla bad ki nongtrei Sorkar na kiwei-kiwei ki ri yn nym kynthup ha ka bynta jong ka HLO.
Haba ai jingkren ha kane ka sngi, u Subhasish Chatterjee, Joint Director, Tnad Census Operations, Meghalaya, u la ban jur ba la plie paidbah ïa ka national toll-free helpline -1855- ha kylleng ka ri India kum ka jingpynkhreh ïa ka Khana samari 2027.
Ïa ki pud jong ka kam synshar jong ka Meghalaya la khang noh naduh ka 31 tarik u Nohprah 2025, na ka bynta ka Khana Samari. Ïa kane ka kam yn pynlong hapoh ka jingpeit jong ki Deputy Commissioner kum ki Principal Census Officer, la kyrshan da ki Charge Officer, ki Supervisor bad ki Enumerator.
Ki heh sorkar, lyngba ki lad pathai khubor, ki la kyntu ïa ki paidbah ban ïashim bynta shitrhem ha ka rukom ai jingtip dalade bad ban pynïar ïa ka jingïatreilang kaba pura sha ki nonglum jingtip ban pynthikna ïa ki jingtip kiba thikna bad kiba lah ban shaniah na ka bynta ka roi ka par kaba kynthup lang ïa baroh bad ka jingsynshar kaba pynshong nongrim ha ki sakhi ha ka Jylla Meghalaya. Ki la ban jur ba kaba kongsan kumjuh ka long ka bynta jong ka jingpynsngewthuh paidbah.
