Shillong, Ïaïong 30
Ka United Democratic Party (UDP) Sengkmie kan dang peit pyrman haduh katno ngut ki nongkitkam ka UDP Mawkyrwat circle ba kin leit rung sha ka NPP ha ka 2 tarik Jymmang, 2026.
Haba ïakren bad u Secretary ka UDP Sengkmie u Bah Titosstarwell Chyne, u la ong ba ïa mynta um pat kwah ban ong eiei hynrei u la ong ba kin sa peit katno ngut ki nongkitkam ka UDP na Mawkyrwat kin leit rung sha ka NPP.
Kumban shu pynkynmaw ba katkum ka jingsaphriang ha rynsan social media, la pyni ba ka shithi ki nongkyrshan jong u Bah Renik Lyngdoh Tongkhar kin pynïasoh noh bad ka NPP ha ka 2 tarik u Jymmang, 2026 ha kaba ïa ka jingïalang yn pynlong ha Nativity Auditorium Mawkyrwat.
Ka jingwan ban pynïasoh jong ki nongkyrshan jong u Bah Renik sha ka NPP ki dei ki dak ki shin ba u MLA ka Mawkyrwat un sa pynïasoh noh bad ka NPP hashwa ka ilekshon MLA ha u snem 2028.
Kumban shu pynkynmaw ba ha u snem 2013 u Bah Renikton Lyngdoh Tongkhar u la mih ban ïakhun ïa ka ilekshon na ka NPP hynrei u la rem noh ha u Bah Rowel Lyngdoh (bam kwai ha dwar U Blei).
Ha ka ilekshon 2018 u Bah Renik u la mih ban ïakhun biang ïa ka ilekshon MLA na ka HSPDP bad ïoh rah ïa ka jingjop da kaba pynliem ïa u Bah Carnes Sohshang tang da 458 vote. Nangta ha u snem 2023 u Bah Renik u la ïakhun noh na ka UDP bad jop da kaba pynliem biang ïa u Bah Carnes Sohshang.
Ki nongkitkam ka NPP ki la ïathuh ba ki ar ngut ki Symbud Myntri Rangbah ka Jylla kata u Bah Prestone Tynsong uba dei u President ka NPP Meghalaya State Unit bad u Bah Sniawbhalang Dhar kin shim ka bynta ban pdiang burom ïa ki nongkitkam bad ki nongkyrshan jong u Bah Renikton Lyngdoh Tongkhar haba kin rung sha ka NPP ryngkat kiwei de ki seng kum ka HSPDP, Congress bad VPP.
