Shillong, Ïaïong 30
Kawei ka samla Khasi kaba shong ba sah ha Bengaluru la lap ba ka la khlad noh ha ïingsah ïa kaba la lap ha ka 29 tarik mynta u bnai Ïaïong, 2026.
Katkum ka kyrwoh ba la phah da ka Khasi Students’ Union (KSU) Bengaluru Unit ka pynpaw ka jingsngewlem halor ka jingkhlad kyndit jong kane ka samla Khasi kaba dei na ki thaiñ Pynursla, East Khasi Hills, Meghalaya.
Katkum ka khubor ba la ïoh lum la ïathuh ba la lap ïa ka met jong kane ka samla ha ka 29 tarik u Ïaïong, 2026 hapdeng ka por 7:00 janmiet haduh 7:30 janmiet, ha ka kamra kaba ka shong ïingwai ha Hebbal, Bengaluru, ha kaba la ïathuh ruh ba ka shong ka sah bad uba la kynnoh ba u dei u samla jong ka, uba la tip kyrteng kum u Nawaz Sharif na Manipur.
Kane ka mukotduma ka dang don ha ka jingtohkit mynta bad la suba ba ka dei ka mukotduma jong ka jingpynïap ïalade lane ka jingsuba ba donkti.
Ki dkhot ka KSU Bengaluru Unit mar sien ïoh ka jingtip ki la poi mar mar sha katei ka ïing sah bad ki don lang ryngkat bad ki paralok jong ka.
Na ka liang ka KSU ka kyntu ïa ki bor ba dei peit ban pynlong ïa ka jingtohkit kaba hok bad kaba janai.
Haba pyrshang ban ïakren bad u Secretary ka KSU Bengaluru Unit u samla Younidame Suchiang u la ïathuh ba ki pulit ki la rah ïa utei uba kynnoh ba dei u samla katba dang ïaid ka jingtohkit bad ki pulit ruh ki la pyndep ïa ka post mortem bad lashai ka sngi ha ka por mynstep ki bahaïing kin sa rah noh ïa ka met jong katei ka samla ban pynpoi sha Meghalaya.
