Shillong, Ïaïong 30
Ki pulit jong ka East Jaiñtia Hills kila ïoh ban kem noh ïa u runar uba la kynnoh donkti ha kaba kyndang ïa ka ATM bad rong tuh ïa ka pisa ba kot haduh T.9,57,000 na ka kor ATM ka HDFC ba don ha Wapung.
Une uba la shah kem u dei uba la tip kyrteng kum u Irsad, ba ju khot sin Rumi, uba 32 snem ka rta na ka shnong Mewat ha Haryana, bad la kem noh ïa une u briew na Tauru ha Haryana, da ka jingïarap jong ki pulit ka Haryana, la ong u Superintendent of Police ka East Jaiñtia Hills Pankaj Rasgonia ha ka kyrwoh ha ka sngi Palei.
Katkum ka jingïathuh u Superintendent of Police ka District, ki runar kila kyndang ïa kane ka ATM ha ka 14 tarik Ïaïong, 2026 da kaba pyndonkam da ka gas cutter.
Halor ka ejahar ba ïoh pdiang, ki pulit kila register ïa ka case ha thanad Khliehriat Case No, 124(04)2026 hapoh ka kyndon 305/324/331/61.(2)/rt2l3(5) BNS bad ka jingtohkit kala ïaid shakhmat.
Ha ka jingtohkit, ki pulit kila lapksai ïa ki runar ba donkti bad dang ha kine ki khyndiat sngi, kila ïoh kem ïa uwei u briew ba kyrteng u Irsad ba ju khot sin u Rumi (32 snem) na Tauru da ka jingïarap ki pulit ka Haryana.
U ïathuh ba une u runar u dei u dkhot jong ka kynhun ki runar na Mewat, kiba donkti ha ka jingkyndang ïa ki kor ATM ha East Khasi Hills, Ri-Bhoi, East bad West Jaiñtia Hills bad North Garo Hills.
Ïa kiwei ki dkhot la ïoh ban kem da ki pulit ka Ri-Bhoi katkum ka thanad Umiam Case No. 20(04)2026 bala pynngat hapoh ka kyndon 30s(a)/331(a) /324(s) / 6t(2)(b)/3(s) BNS.
Lah ban kdew ba ki pulit ka Ri-Bhoi kila ïoh kem haduh 6 ngut ki runar ba kyndang ïa ka ATM ka MCAB ha Bhoirymbong ba kynthup ïa 3 ngut kiba kem na Barpeta, Assam bad 3 ngut na Haryana.
