Shillong, Ïaïong 30
Ka National People’s Party (NPP) ka la leit ban ïakynduh ïa u President ka Khasi Authors’ Society (KAS) u Dr. DRL Nonglait ban tyrwa ïakhun ïa ka ilekshon MP shiteng samoi sha Shillong Lok Sabha ka ban wan da ka tiket jong ka seng, hynrei une u nonghikai u la kyntait ba um shym la ïoh ïa kum kane ka jingtyrwa.
Ka tyllong khubor kaba ïajan bha hapoh ka seng ka la pynthikna ba ka NPP ka la leit ban ai kane ka jingtyrwa ha u Dr. Nonglait.
Hynrei, ka NPP ka dang ap ïa ka jubab ka jong u.
“U (Dr. Nonglait) u la pan por ban ïakren bad ki bahaïing hasem bad ki nongkyrshan jong u shwa ban shim ïa ka rai la un pdiang ne kyntait ïa katei ka jingtyrwa”, la ong uwei na ki nongïalam ba rangbah ka NPP uba ym kwah ban pynpaw kyrteng.
Ka NPP shen kan sa shong jingïalang ban ïakren halor ka jingpynkhreh na ka bynta ka ilekshon MP shiteng samoi bad ban pynbeit ïa u kyrtong jong ka.
Ki briew kiba don hapoh ka NPP ki la ong ba u Dr Nonglait, la shim ba u long uba biang ban mihkhmat ïa ka konstitwensi ha Parliament.
“U Dr. Nonglait u long uba biang tam ban mihkhmat ïa ka Shillong Parliamentary Konstitwensi bad ban buddien bad ka Sorkar Pdeng halor ki mat jingdawa kiba la sahteng la slem bha ba kynthup ïa ka jingpynrung ïa ka ktien Khasi bad Garo ha ka Khyrnit ba Phra jong ka Riti Synshar ka Ri India bad ban pyntreikam ïa ka Inner Line Permit (ILP) nalor kiwei pat ki mat ba ïakynduh da ka Jylla,” ong une u nongïalam ba rangbah.
Haba ïakren bad u Dr. DRL Nonglait, u la kyntait ba ym shym la don kano-kano ka jingtyrwa.
“Ngam don jingtip shisha, ngam don jingtip eiei halor kane”, u la ong haba kdew ïa ka jingpynpur khubor ha ki rynsan social media ba un ïakhun na ka tiket ka NPP.
“Haduh kane ka khyllipmat, ym pat don mano-mano ba wan ban ai kum kane ka jingtyrwa ïa nga”, u la bynrap.
Ha ka ilekshon Lok Sabha 2024, ka NPP ka la wan ha ka kyrdan kaba lai ha Shillong.
Ka Myntri Sorkar barim ka Kong Ampareen Lyngdoh kaba dei ka kyrtong jong ka seng ka la shah rem ha u MP ka Voice of the People Party u Dr Ricky AJ Syngkon (bam kwai ha dwar U Blei) uba la jop da ka jingjop da kaba khur 5,07,078 vote. Ka Kong Ampareen ka la ïoh tang 1,86,488 vote.
